سەركونسڵی ئێران بۆ یەكێتی: بە بایەخەوە لەخەباتی دوور و درێژتان دەڕوانین

PUKMEDIA

سەردانی وەفدی كونسڵخانەی كۆماری ئیسلامی ئێران بۆ بارەگای مەكتەبی سیاسی یەكێتی

بەبۆنەی یادی یوبیلی زێڕینی دامەزراندنی یەكێتیی نیشتیمانیی كوردستان و گەیاندنی پەیامی پیرۆزبایی كۆماری ئیسلامی ئێران، ئەمڕۆ 3-6-2025، وەفدێكی باڵای كونسڵخانەی كۆماری ئیسلامی ئێران لە هەولێر بەسەرۆكایەتی فەرامەرز ئەسەدی، سەركونسڵی گشتی كۆماری ئیسلامی ئێران لە هەرێمی كوردستان و ژمارەیەك لە راوێژكار و دیبلۆماتكارانی كونسڵخانەكە سەردانی بارەگای مەكتەبی سیاسی یەكێتی-یان لە هەولێر كرد و لەلایەن سەعدی ئەحمەد پیرە ئەندامی مەكتەبی سیاسی و وتەبێژی یەكێتییەوە پێشوازیكران. 
 
فەرامەرز ئەسەدی، سەركونسڵی گشتی كۆماری ئیسلامی ئێران لە هەرێمی كوردستان ئاماژەی بە پەیوەندی دۆستانە و دێرینی نێوان كۆماری ئیسلامی ئێران و یەكێتیی نیشتیمانیی كوردستان كرد، هاوكات تیشكی خستەسەر رۆڵی خوالێخۆشبوو سەرۆك مام جەلال لە بنیادنان و پەرەپێدانی ئەو پەیوەندییانە و زیاتر هەماهەنگی و دۆستایەتی نێوان هەردوولا.
وتیشی: "یەكێتیی نیشتمانیی كوردستان مێژوویەكی پڕ لە خەبات و تێكۆشان و قوربانی لە پێناو هێنانەدی ئازادی و دیموكراسی و مافی مرۆڤدا هەیە، كۆماری ئیسلامی ئێران بەبایەخ و رێزلێنانەوە دەڕوانێتە ئەو خەباتە دوور و درێژە و هیواخوازی زیاتر هەماهەنگی و پەیوەندی دۆستانەین". 
 
سەعدی ئەحمەد پیرە سوپاسی هاتن و بەشداریكردنی وەفدی كونسڵخانەی كۆماری ئیسلامی ئێرانی كرد و هیوای خواست ئەم بەشدارییەش وێستگەیەك بێت بۆ نوێكردنەوەی ئەو پەیوەندییە مێژوویی و دێرینەی لەنێوان هەردوولادا هەیە، ئاماژەشی بە رۆڵ وگرنگی كۆماری ئیسلامی ئیران كرد لە پشتیوانی كردنی كۆمەڵانی خەڵكی كوردستان لە قۆناغە جیاوازەكانی خەباتی شۆڕشگێرانەی گەلەكەمان بەگشتی و شۆڕشی نوێ بە رابەرایەتی یەكێتیی نیشتمانیی كوردستان بە تایبەتی، هەر بەم بۆنەیەوە كونسڵخانەی كۆماری ئیسلامی ئێران لە هەولێر پەیامێكی پیرۆزبایی بەنووسراو بەبۆنەی یۆبیلی زێڕینی یەكێتی ئاڕاستەی سەرۆك بافڵ جەلال تاڵەبانی و سەركردایەتی یەكێتی كرد.

PUKMEDIA