بڕیاردەری فراکسیۆنی یەکێتی: عیراق سولفەیەک بۆ هەرێم دەنێرێت

PUKMEDIA

کاروان یاروەیس بڕیاردەری فراکسیۆنی یەکێتی لەئەنجومەنی نوێنەرانی عیراق`

بڕیارە لەماوەی دوو رۆژی داهاتوودا، عیراق بڕێک پارە بەشێوەی سولفە بۆ هەرێم بنێرێت، بۆئەوەی پێش جەژنی قوربان مووچەی مانگی ئایاری موچەخۆرانی هەرێم-ی پێ دابەشبکرێت.

کاروان یاروەیس بڕیاردەری فراکسیۆنی یەکێتی لەئەنجومەنی نوێنەرانی عیراق، بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" بڕیارە لەماوەی ئەمڕۆ و سبەینێدا حکومەتی عیراق سولفەیەک بۆ هەرێم بنێرێت، بۆئەوەی پێش جەژنی قوربان مووچەی مانگی ئایاری موچەخۆرانی هەرێم-ی پێ دابەشبکرێت".

"بەپێی بڕیاری دادگای فیدراڵی نابێت ئەو پارەیەی بەغدا بۆ هەولێری دەنێرێت ناوی قەرزی لێبهێنرێت، چونکە هەرێم پشکی هەیە لەبودجەی گشتی عیراق-دا، هاوکات لەدوای جەژنی قوربان، پێویستە بۆ ماوەی 30 رۆژ لیژنەیەک بۆ پێداچوونەوە بەڕێککەوتن لەنێوان هەردوو حکومەت پێکبهێنرێت، بەمەبەستی جێبەجێکردنی ئەو خاڵانەی لەڕێککەوتنەکەدا هاتووە و جێبەجێکنەکراون"، کاروان یاروەیس وایوت.

بڕیاردەری فراکسیۆنی یەکێتی لەئەنجومەنی نوێنەرانی عیراق ئاماژەی بەوەشکرد: "هەردوو حکومەت بەرپرسیارن لە دواکەوتن و دابەشنەکردنی مووچەی مووچەخۆرانی هەرێم، هەرچەندە بڕیارەکەی دارایی عیراق زیاتر سیاسیی بووە و پێچەوانەی دەستوور و بڕیاری دادگا و یاساش بوو".

ئەمەش لەکاتێکدایە، رۆژی 28ی5ی2025 وه‌زیری دارایی عیراق بڕیاریدا چیتر مووچه‌ بۆ هه‌رێم نه‌نێرێت، هۆكارەکەشی گەڕاندەوە بۆ ئه‌وه‌ی كه‌ پشكی هه‌رێم له‌بودجه‌ی سێ ساڵی رابردوو، كه‌ له‌په‌ڕله‌مانه‌وه‌ په‌سند كراوه‌ بۆ ساڵه‌كانی 2023 و 2024 و 2025 ته‌واوبووه‌، بەشێک لە لایەنە کوردستانیەکانی-ش بڕیارەکەیان بەنادەستووری ناوبرد. 

PUKMEDIA