کۆمسیۆن:33 هەزار ئاوارە تۆماری دەنگدانیان نوێ کردووەتەوە

PUKMEDIA

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق

کۆمسیۆنی باڵای سەربەخۆی هەڵبژاردنەکانی عیراق ئاشکرای دەکات 33 هەزار ئاوارە کارتی بایۆمەتریان نوێ کردووەتەوە و میکانیزمەکانی شێوازی دەنگدانیشیان رووندەکاتەوە.

 جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە PUKMEDIA ی راگەیاند:" بەپێی هەمواری یاسای هەڵبژاردنەکان ژمارە 12ی ساڵی 2018 ئاوارەکان دەنگدەدەن".

"وەزارەتەکانی کۆچ و کۆچبەران و بازرگانی ژمارەی ئاوارەکان بە کۆمسیۆن دەدەن، هەروەها ئاوارەکان دەتوانن لە کەمپەکەی خۆیانەوە دەنگ لەسەر ئەو بازنەیەی پارێزگایە بدەن کە لێی ئاوارە بوون"، جومانە غەلای وایوت.

 پەیوەست بە ئاوارەکانی شەنگالیش، جومانە غەلای رایگەیاند:" ئاوارەکانی شەنگال لەو شوێنە دەنگدەدەن کە تێیدا نیشتەجێن، جا ناو کەمپەکان بێت یان دەرەوە، هەروەها دەتوانن لەسەر ئەو بازنەیە دەنگبدەن کە لێوەی ئاوارە بوون،ئەمەش بەپێی کارتی بایۆمەتری دەنگدان دەبێت".

راشیگەیاند:" لەرێگای نوێکردنەوەی تۆماری دەنگدەرانەوە ،کۆمسیۆن دەیەوێت ژمارەی کۆتایی ئاوارەکان دیاریبکات، کەلە 16 کەمپی دهۆک و پێنجی هەولێر نیشتەجێکراون".

 لە کۆتایشدا، جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق ئاشکرای کرد:" تاوەکو ئێستا 33 هەزار ئاوارە کارتی بایۆمەتریان نوێ کردووەتەوە".

PUKMEDIA