مەكتەبی سیاسی پارتی بۆ یەكێتی: تەئكید لە تەبایی نێوانمان دەكەینەوە

PUKMEDIA

لۆگۆی یەکێتیی نیشتمانیی کوردستان و پارتی دیموکراتی کوردستان

لە یادی خەباتی  50 ساڵەی دامەزراندن و یۆبیلی زێڕینی یەكێتیی نیشتمانیی كوردستاندا، مەكتەبی سیاسیی پارتی دیموكراتی كوردستان، پەیامێكی پیرۆزبایی ئاڕاستەی سەرۆك بافڵ و ئەندامانی مەكتەبی سیاسی و سەركردایەتی یەكێتی دەكات و رایدەگەیەنێت: "پیرۆزباییەكی گەرم لە حزبە تێكۆشەرەكەتان دەكەین و تەئكید لە تەبایی نێوانیشمان دەكەینەوە".

دەقی پەیامەكە:

بەڕێز بافڵ جەلال تاڵەبانی، سەرۆكی یەكێتیی نیشتیمانیی كوردستان

بەڕێزان ئەندامانی مەكتەبی سیاسی و سەركردایەتی یەكێتیی نیشتیمانیی كوردستان 

بە بۆنەی ساڵیادی دامەزراندنی یەكێتیی نیشتیمانیی كوردستان، پیرۆزباییەكی گەرم لە ئێوەی بەڕێز و ئەندام و لایەنگرانی حزبە تێكۆشەرەكەتان دەكەین و هیوای بەردەوامیی و سەركەوتنتان بۆ دەخوازین.   

لەو دەرفەتەدا جارێكی دیكە جەخت دەكەینەوە سەر هەماهەنگی و تەبایی نێوانمان و  شانبەشانی هێز و لایەنە سیاسیەكانی دیكەی كوردستان بۆ بەجێگەیانی ئەركە هاوبەشەكانمان لەم قۆناخە پڕ ئاڵنگاری و گۆڕانكارییە دا و پاراستنی دەسكەوتەكانمان و داكۆكیكردن لە قەوارەی شەرعی هەرێمی كوردستان.

جارێكی دیكە پیرۆزباییتان لێدەكەین و هەر سەركەوتوو بن..

مەكتەبی سیاسیی پارتی دیموكراتی كوردستان

PUKMEDIA