سەرۆكی فراكسیۆنی یەكێتی: دژی راگرتنی مووچە دەوەستینەوە

PUKMEDIA

هەرێم كەمال ئاغا سەرۆكی فراكسیۆنی یەكێتی لە ئەنجومەنی نوێنەرانی عیراق

فراكسیۆنە كوردستانییەكان لە ئەنجومەنی نوێنەرانی عیراق دژی نوسراوەكەی وەزیری دارایی عیراق وەستانەوە و سەرۆكی فراكسیۆنی یەكێتیش دەڵێت: "نوسراوەكەی وەزیری دارایی عیراق لەڕوی ئیداریی و دارایی و یاسایی و دەستوورییەوە پێشێلكردنی مافی مووچەخۆرانی هەرێمی كوردستانە".

هەرێم كەمال ئاغا سەرۆكی فراكسیۆنی یەكێتی لە ئەنجومەنی نوێنەرانی عیراق، بە وێبسایتی رەسمی یەكێتیی نیششتمانیی كوردستان PUKMEDIA ی راگەیاند: "لە كۆبوونەوەی ئەمڕۆی سەرۆكی فراكسیۆنە كوردستانییەكان لە ئەنجومەنی نوێنەران، بەتێكڕا نوسراوەكەی وەزیری دارایی عیراق-مان سەبارەت بە راگرتنی مووچەی مووچەخۆرانی هەرێم رەتكردەوە".

"وەك فراكسیۆنە كوردستانییەكان داوا لە سەرۆك كۆمار و سەرۆك وەزیرانی عیراق و دادگای باڵای فیدراڵی دەكەین كە ئەو هەڵەیە راستبكرێتەوە، چونكە پێمانوایە نوسراوەكە سەرپێچی یاسایە و بە بڕیارێكی سیاسیی دەزانین، هاوكات وەزیری دارایی ئەو دەسەڵاتەی نییە كە مووچەی مووچەخۆرانی هەرێم رابگرێت" هەرێم كەمال ئاغا وایوت.
راشیگەیاند: "فراكسیۆنە كوردستانییەكان هاوڕابوون لەسەر ئەوەی كە هێشتا زووە خەمڵاندن بۆ ئەو بڕە پارەیە بكرێت كە پشكی هەرێمە لە بودجەدا، تا بڕیار بدرێت كە كۆتایی بە پشكەكە هاتووە، چونكە بەگشتی لە مانگی 10 دا وەزارەتی دارایی دەتوانێت ئەم خەمڵاندنە بكات".

سەرۆكی فراكسیۆنی یەكێتی لە ئەنجومەنی نوێنەرانی عیراق وتیشی: "نوسراوەكەی وەزیری دارایی لە روی ئیداری و یاسایی و دارایی و دەستوورییەوە نایاساییە و پێچەوانەی بڕیارەكەی دادگای فیدراڵیشە، چونكە بە ئاشكرا دادگاكە ئەوەی خستووەتەڕوو كە نابێت مووچەی مووچەخۆرانی هەرێم تێكەڵ بە ململانێ سیاسییەكان بكرێت".

سەبارەت بە ناڕەزایی وەزیری دارایی عیراق لە رێككەوتنەكەی نێوان حكومەتی عیراق و حكومەتی هەرێم كە ئەگەر پێی وابێت حكومەتی هەرێم بە رێككەوتنەكەوە پابەند نەبووە، سەرۆكی فراكسیۆنی یەكێتی رایگەیاند: "تەیف سامی وەزیری دارایی دەیتوانی سكاڵا لەسەر حكومەتی هەرێم لە دادگای فیدراڵی تۆمار بكات، نەك مووچەی مووچەخۆرانی هەرێم بە بارمتە بگرێت".

PUKMEDIA