دەرگای خۆ تۆماركردن بۆ كارمەندانی سەر سندووق دەكرێتەوە

PUKMEDIA

نمونەی فۆڕمی دەنگدان

كۆمسیۆنی باڵای سەربەخۆی هەڵبژاردنەكانی عیراق بەردەوامە لە ئامادەكاریی بۆ هەڵبژاردنی ئەنجومەنی نوێنەرانی عیراق و هەفتەی داهاتووش دەرگای خۆ تۆماركردن بۆ كارمەندانی سەر سندووقی دەنگدان دەكرێتەوە.

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق بە وێبسایتی رەسمی یەكێتیی نیشتمانیی كوردستان PUKMEDIA  ی راگەیاند: "سێ شەممەی داهاتوو 3-6-2025، دەرگای خۆ تۆماركردن بۆ كارمەندانی سەر سندووقی دەنگدان دەكرێتەوە و ئەو كەسانەی خوازیارن لە هەڵبژاردنی ئەنجومەنی نوێنەرانی عیراقدا لەسەر سندووق بن دەتوانن ناوی خۆیان تۆمار بكەن".

" كۆمسیۆنی باڵای سەربەخۆی هەڵبژاردنەكانی عیراق بەردەوامە لە ئامادەكاریی بۆ هەڵبژاردنی ئەنجومەنی نوێنەرانی عیراق كە بڕیارە رۆژی 11-11-2025 ئەنجامبدرێت" جومانە غەلای وادەڵێت.

راشیگەیاند: "دوا وادە بۆ وەرگرتنەوەی لیستی كاندیدان كە خۆی لە لیستی كراوە و لیستی تاكەكاندا دەبینێتەوە، رۆژی 24-6-2025 ە، هاوكات بەپێی بڕیاری ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكانی عیراق، رۆژی 14-6-2025 كۆتا رۆژە بۆ نوێكردنەوەی تۆماری دەنگدەران".

ئەمەش لەكاتێكدایە رۆژی 9ی 4ی 2025 ئەنجومەنی وەزیران كۆبوونەوەیەكی بە سەرۆكایەتی محەمەد شیاع سودانی سەرۆكی ئەنجومەنی وەزیرانی عیراق ئەنجامدا و رێكەوتی 11ی 11ی 2025، وەك وادەی ئەنجامدانی هەڵبژاردنی خولی شەشەمی ئەنجوومەنی نوێنەرانی عیراق دیاریكرد.

PUKMEDIA