تایخوێنەربوون لە 14 پارێزگای عیراق بڵاودەبێتەوە

Science Direct

سوڕی تووشبون بە نەخۆشی تایخوێنبەربوون

وەزارەتى تەندروستیى عیراق ئاشکرایدەکات، لە شەش مانگی رابردووی ئەمساڵەوە تائێستا 95  حاڵەتی تاى خوێنبەربوون  تۆمارکراوە و رایدەگەیەنێت:"  13 کەس لەو ژمارەیە گیانیان لەدەستداوە  و بەرزترین رێژەی تووشبونیش لە پارێزگاى زیقارە کە 29  حاڵەتەو و یەک کەسیش گیانی لەدەستداوە".

 سەیف بەدر وتەبێژی وەزارەتى تەندروستیى عیراق رایدەگەیەنێت:" زۆرترین گیانلەدەستدان بەهۆی نەخۆشی تایخوێنبەربوونەوە لە پارێزگاى کەرکوک بووە، کە  لە پێنج تووشبوو چوار کەسیان گیانیان لەدەستدا".

"لە بەغدا 13 کەس تووشبوون و سێ کەسیان گیانیان لەدەستداوە، لە واستیش 11 کەس تووشبوون و کەسێک گیانیلەدەستداوە و لە موسەنناش 7 کەس تووشبوون و 2 کەسیان گیانیان لە دەستداوە، لە پارێزگای دیالەش 5 کەس تووشی نەخۆشیی تای خوێنبەربوون و یەک کەسیان گیانیلەدەستداوە، لە پارێزگای دهۆکیش 2 کەس تووشی نەخۆشییەکەبوون و یەک کەسیان گیانیلەدەستداوە"، وتەبێژی تەندروستی عیراق وادەڵێت.

هەر بەگوێرەی زانیارییەکانی وەزارەتی تەندروستی لە  پارێزگای نەینەوا 6 کەس، لە میسان 6 کەس، لە بەسڕە 5 کەس و لە دیوانییە 2 کەس و هەر یەک لە پارێزگاکانی بابل، ئەنبار، هەولێر و کەربەلا یەکی یەک کەس تووشی نەخۆشییەکە بوون، بەڵام لەو پارێزگایانەدا هیچ تووشبوویەک گیانی لەدەست نەداوە.

وەزارەتى تەندروستیى عیراق لە راگەیەندراوێکدا ئاماژەى بەوەکردووە، ئەوانەى تووشبوون ئاژەڵدار و گۆشتفرۆش بوون، بە پێویستى دەزانێت کەرەستەى خۆپارێزى بەکاربهێنرێت و هۆشداریى دەدات، کە مێرووى جۆرى گەنە، هۆکارى تووشبوونە بە نەخۆشییەکە.

وەزارەتى تەندروستیى عیراق  دەشڵێت:"  پێداویستییەکانى دیاریکردنى نەخۆشییەکە لە سەرجەم دامودەزگا تەندروستییەکانى عیراق و هەرێمى کوردستان دابینکراون".

ئەمەش لەکاتێکدایە، بەپێی هەڵمەتی هۆشیاری بۆ بەرەنگاربوونەوەی نەخۆشییەکە،  هاووڵاتییان ئاگادار دەکرێنەوە کە گۆشت لەو شوێنانە بکڕێن، کە دڵنییان لەسەرچاوەکەى و گۆشتەکە لە پلەیەکى گەرمیى نزمدا دایبنێن و دواتر لە پلەیەکى گەرمیى بەرزدا بیکوڵێنن.

PUKMEDIA