خوێندنی ئه‌مساڵ كۆتاییهات

بوابە فهرس

ئەنجامدانی تاقیکردنەوە

ئه‌مڕۆ 26ی5ی2025 كۆتایی به‌تاقیكردنه‌وه‌كانی پۆله‌ ناكۆتاكان و تاقیكردنه‌وه‌ی نیشتمانی قۆناغی ( 9 )ی بنه‌ڕ‌ه‌تی هات، كه‌ نزیكه‌ی یه‌ك ملیۆن و 500 هه‌زار خوێندكار به‌شداری تاقیكردنه‌وه‌كانیان كرد.

تاقیكردنه‌وه‌ی كۆتایی ساڵی پۆله‌ ناكۆتاكان، رۆژی 17ی5ی2025 به‌ به‌شداری زیاتر له‌ یه‌ك ملیۆن خوێندكار، ده‌ستیپێكردو دوای نۆ رۆژ ئه‌مڕۆ كۆتایی هات.

ئه‌مه‌ له‌كاتێكدایه‌، وه‌زاره‌تی په‌روه‌رده‌ی حكومه‌تی هه‌رێمی كوردستان له‌ راگه‌یه‌نراوێكدا ئاماژه‌ی بۆ ئه‌وه‌کرد، زیاتر له‌ یه‌ك ملیۆن و 387 هه‌زار و 895 خوێندكار له‌تاقیكردنه‌وه‌كاندا به‌شداربوون، هه‌روه‌ها زیاتر له‌حه‌وت هه‌زار و 370 خوێندنگه‌ له‌شارو شارۆچكه‌كانی هه‌رێمی كوردستان هه‌ن؛ له‌و ژماره‌یه‌ش شه‌ش هه‌زارو 863یان حكومیین.

هه‌ر له‌و باره‌یه‌وه‌ مامۆستا نه‌ژاد عه‌بدوڵڵا به‌ڕێوه‌به‌ری گشتی په‌روه‌رده‌ی سلێمانی په‌یامێكی بڵاوكرده‌وه‌و رایگه‌یاند:"به‌بۆنه‌ی كۆتایی هاتنی تاقیكردنه‌وه‌كانی پۆله‌ ناكۆتاكان و تاقیكردنه‌وه‌ی نیشتمانی قۆناغی ( 9)ی بنه‌ڕ‌ه‌تی پیرۆزبایی له‌ سه‌رجه‌م خوێندكاران ده‌كه‌م و هیوای سه‌ركه‌وتن و به‌ده‌ستهێنانی نمره‌ی به‌رزیان بۆ ده‌خوازم".

هه‌روه‌ها،"زۆر سوپاسی سه‌رپه‌رشتیاران و به‌ڕێوه‌به‌ر و مامۆستایان و فه‌رمانبه‌ران و ده‌سته‌ی كارگێڕی خوێندنگه‌كان و دایبابانی خوێندكاران ده‌كه‌م كه‌ سه‌ره‌ڕ‌ای قه‌یرانه‌كان توانیان ئه‌مساڵی خوێندنیش به‌سه‌ركه‌وتوویی تێبپه‌رێنن".

ئەمەش لەکاتێکدایە، له‌چه‌ند رۆژی رابردوودا خوێندكارانی پۆله‌كانی یه‌ك و دوو سێی بنه‌ڕه‌تی له‌ رێگه‌ی ئۆنلاین و به‌به‌كارهێنانی یوزه‌ر و پاسۆرد توانیان ئه‌نجامی تاقیكردنه‌وه‌كانیان وه‌ربگرنه‌وه‌، هاوكات به‌پێی راگه‌یه‌نراوێكی وه‌زاره‌تی په‌روه‌رده‌ بۆ پۆله‌كانی دیكه‌ش به‌هه‌مان شێوه‌ و به‌ڕێگەی ئۆنلاین خوێندكاران و دایكان و باوكان ده‌توانن له‌ماڵه‌كه‌ی خۆیاندا نمره‌ی تاقیكردنه‌وه‌كانی خوێندكاره‌كانیان وه‌ربگرنه‌وه‌.

PUKMEDIA