ستران عەبدوڵڵا: نەوەکانی ناو یەکێتی بە ئەزموون حزبەکەیان هەڵبژاردووە

PUKMEDIA

ستران عەبدوڵڵا ئەندامی سەرکردایەتی یەکێتیی نیشتمانیی کوردستان

ئەندامێکی سەرکردایەتی یەکێتیی نیشتمانیی کوردستان رایدەگەیەنێت:" سات و ساڵی دروستبوونی یەکێتی دەیان تێکۆشەری تەمەن جیاجیای گرتبووەخۆ، لە 20 بۆ 50 ساڵ سەروتریش، لەگەڵ درێژی رەوتی تێکۆشانی یەکێتی تەمەن بۆ خوارتر و بۆ سەروتریش هەڵکشا".

ستران عەبدوڵڵا ئەندامی سەرکردایەتی یەکێتیی نیشتمانیی کوردستان لەوتارێکیدا کە لەبەشی بیروڕای وێبسایتی رەسمیی یەکێتیی نیشتمانیی کوردستان PUKMEDIA بە ناونیشانی ( نەوەکان لە پەنجا ساڵەی یەکێتیدا) بڵاوکراوەتەوە نووسیویەتی:"سات و ساڵی دروست بوونی یەکێتی دەیان تێکۆشەری تەمەن جیاجیای گرتبووەخۆ ، لە بیست ساڵ بۆ پەنجا ساڵ سەروتریش، لەگەڵ درێژی رەوتی تێکۆشانی یەکێتی تەمەن بۆ خوارتر و بۆ سەروتریش هەڵکشا".

هەر لەوتارەکەدا ئاماژەی بەوەشکردووە:"لەناو ئەم خەریتە پان و پۆڕەدا رێبەری رێکخستن و رابەری سیاسی و فەرماندە و پێشمەرگە و رێکخستن و جەنگاوەر و سەرکردە و بنکەفراوان و جەماوەر و دەنگدەر و ئەندام و گوڵەندام (بە قەولی شەهید شازاد سائیب) کچان و کوڕانی ئازا، ژنان و پیاوانی بەجەرگ، خوشکان و برایانی وەفادار، باوک و کوڕی دڵسۆز و تەنانەت باپیری بە ورە و هیمەت هەبوون، هەروەها وەکو وانە و دەرسی بەلیغ و رەوان و بەرینی ژیانیش کەمێک لادەر و ماندوو و تاقەت چووش هەر هەبوون کە ئیشی سوڕی ئەم ماشێنە ئەوە بوو کاروان راست و دروست و تەندروستەکە لە هێڵی گشتیدا زیان کەم بکاتەوە،بە کەمترین زیانەوە لادان و لەڕێ لاچوون ئیحتوا بکات".

PUKMEDIA