بۆ رووماڵی لوتکەی عەرەبی 381 رۆژنامەنوس گەیشتونەتە بەغدا

ئاژانسەکان

ناوەندى میدیایى لوتكەی عەرەبی

لەرووی میدیاییەوە بایەخی زۆر بە لوتکەی عەرەبی دەدرێت، کە بڕیارە رۆژی شەممەی داهاتوو لە بەغدا بەڕێوەبچێت و تائێستا 381 رۆژنامەنوسی بیانی و عەرەبی گەیشتوونەتە بەغدا و لەرۆژانی داهاتووشدا ژمارەیەکی دیکە دەگەنە عیراق.

حەیدەر مەجید ئەندامی لیژنەی راگەیاندنی لوتكەی بەغدا رایدەگەیەنێت:" راگەیاندنەکان بەشداری بەرچاویان دەبێت لەرووماڵ و گواستنەوەی چالاکییەکانی لوتکەی عەرەبی و لەرێی میدیای چاپكراو، دەنگی، بینراو، ئەلیكترۆنی و ژمارەیەکی باش لە میدیاکاری بیانیش هاتونەتە بەغدا".

" پلاتفۆرمی میدیایی تایبەت بە هەماهەنگی لەگەڵ وەزارەتەكانی ناوخۆ و دەرەوە كراوەتەوە، هەروەها سەرجەم نوێنەرایەتییەكانی عیراق لە دەرەوەی وڵات راسپێردراون، كە ئاسانكاری پێویست بۆ رۆژنامەنووسان بكەن، لەوانە پێدانی ڤیزەی هاتنە ژوورەوە بە خێرایی و بێ بەرامبەر، تا ئەمڕۆ 15/5  لە 381 رۆژنامەنووسی عەرەب و بیانی لە رێگەی فڕۆكەخانەی نێودەوڵەتی بەغداوە هاتوونەتە ناو وڵاتەوە، پێشبینیش دەكرێت تا ئێوارەی هەینی ژمارەكە زیاد بكات، ئەمەش پێش دەستپێكردنی لوتكەی عەرەبی" حەیدەر مەجید وایوت.

 بۆ بایەخدان و ئامادەکارییەکان لە بواری میدیاییەوە ناوەندی میدیایی پێکهێنراوە و ئەرکەکان رادەپەڕێنێت و پێشوازی لە رۆژنامەنوسان دەکات.

ناوەندەكە بە هەموو خزمەتگوزارییە تەكنیكی و لۆجستیەكانەوە ئامادە كراوە  و سەكۆی رەسمییە بۆ هەموو هەواڵ و زانیارییە دەرچووەكان لەلایەن لوتكەكەوە.

PUKMEDIA