سەرۆککۆمار : لوتکەی عەرەبی باس لەپرسە چارەنووسسازەکان دەکات

نوسینگەى راگەیاندنى سەرۆککۆمار

کۆبوونەوەى سەرۆککۆمار لەگەڵ وەفدێکی رەسمی راگەیاندکارانی کۆمکاری وڵاتانی عەرەبی

سەرۆک کۆمار د.لەتیف جەمال رەشید، ئەمڕۆ 15ی ئایاری 2025 لەبەغداد -کۆشکی سەلام ، پێشوازیکرد لەوەفدێکی رەسمی راگەیاندکارانی کۆمکاری وڵاتانی عەرەبی  و چەندین تەوەرى جیاوازیان تاوتوێکرد و رایگەیاند: "میوانداریکردنی بەغداد بۆ لووتکەی عەرەبی دەگەڕێتەوە بۆ رۆڵی سەرەکی و هەوڵە جەمسەرییەکانی بۆ پتەوکردنی کاری هاوبەش بۆ رووبەڕووبوونەوەی ئەو ئاڵنگاریانەی رووبەڕووی ناوچەکە دەبنەوە".

لەسەرەتای دیدارەکەدا سەرۆککۆمار بەخێرهاتنی ئەندامانی وەفدی میوانی کرد و هیوای سەرکەوتنی لەکارەکانیاندا بۆ خواستن، بەجۆرێک پەیوەندیی برایەتیی و تەبایی لەنێوان گەلاندا پتەوتر بکات و سەقامگیری سیاسی و ئەمنی و ئابووری لەناوچەکەدا بەرجەستە بکات.

سەرۆک کۆمار جەختی لەوە کردەوە، کە میوانداریکردنی بەغداد بۆ لووتکەی عەرەبی دەگەڕێتەوە بۆ ڕۆڵی سەرەکی و هەوڵە جەمسەرییەکانی بۆ پتەوکردنی کاری هاوبەش بۆ رووبەڕووبوونەوەی ئەو ئاڵنگاریانەی رووبەڕووی ناوچەکە دەبنەوە و پەرەپێدانی هاوکاری و هەماهەنگی نێوان برایان بەشێوەیەک کە بەرژەوەندیی گەلەکانمان بپارێزێت ودوپاتیشی کردەوە کە لوتکەی عەرەبی باس لەپرسە چارەنووسسازەکان دەکات و  پەسەندکردنی ئەو بڕیارانەی کەیارمەتیدەربن لەگەیشتن بەئاشتی و سەقامگیری بۆ گەلانی ناوچەکە.

هەروەها سەرۆککۆمار ئاماژەی بەڕۆڵی سەرەکی میدیا کرد، لەبەدیهێنانی پەیوەندی نێوان جەماوەر و داڕێژەرانی سیاسەت و ئاگادارکردنەوەی رای گشتی لەو پلان وستراتیژە خوازراوانەی کەئامانجەکانی گەشەپێدانی بەردەوام و خواستی وڵاتان و گەلانی ناوچەکە بۆ خۆشگوزەرانیە.

سەرۆککۆمار پشتیوانی عیراقی بۆ گەلی فەلەستین و مافی رەوای چارەنووس و دامەزراندنی دەوڵەتی سەربەخۆیانی دووپاتکردەوە.

سەبارەت بەپرسی سوریا، جەختی لە گرنگی رێزگرتن لە ئیرادەی گەلی سوریا بە هەموو پێکهاتەکانیەوە کردەوە و ئاماژەی بە گرنگی پتەوکردنی پەیوەندییەکانی نێوان هەردوو وڵات لەسەر بنەمای رێزگرتنی یەکتر بە شێوەیەک کەخزمەت بە بەرژەوەندییە هاوبەشەکان بکات.

هاوکات هیوای سەرکەوتنی بۆ دانوستانە بەردەوامەکانی نێوان کۆماری ئیسلامی ئێران و ویلایەتە یەکگرتووەکانی ئەمریکا خواست.

سەرۆککۆمار ئاماژەی بە پێویستی کۆتایی هێنان بە ململانێکانی سودان و یەمەن کرد و دوپاتی لەوە کردەوە کەعیراق پشتیوانی لە سەقامگیری هەردوو وڵات و ئاشتی لە ناوچەکەدا دەکات.

سەرۆککۆمار تیشکی خستە سەر ئەو سەقامگیرییە ئەمنی و ئابووری و سیاسیەی کە ئێستا لەعیراق بەرقەرارە لەگەڵ پەرەپێدانی پەیوەندییەکانی لەگەڵ وڵاتانی ناوچەکە وجیهان .

داوای لە میدیاکاران کرد وێنایەکی راستەقینەی سەقامگیری ئەمنی لەعیراق و پێکەوەژیانی نێوان هەموو پێکهاتەکانی کۆمەڵگەی عیراقی بگەیەنن و  جیهانیش ئاگاداربکەنەوە لەو هەنگاوە گەورانەی کەلەبواری چەسپاندنی سیستمی دیموکراسی و پاراستنی مافەکانی مرۆڤدا بەدەستهاتوون.

لەلای خۆیانەوە ئەندامانی وەفدەکە سوپاس و پێزانینی خۆیان بۆ سەرۆککۆمار دەربڕی و پەرۆشییان بۆ پتەوکردنی پەیوەندییەکانی برایەتی و هاوکاری نێوان گەلان لەڕێگەی کارە میدیاییەکانیانەوە بەمەبەستی گەیاندنی راستی رووداوەکان بە هەموو جیهان دووپات کردەوە.

هەروەها وەفدەکە هیوای سەرکەوتنیان بۆ لووتکەی بەغداد و بەدیهێنانی ئامانج  و خواستەکانی گەلان بۆ ئاشتی  و خۆشگوزەرانی دەربڕی و سوپاسی هەوڵەکانی عیراقیان لەبەستنی کۆنگرەکە و میوانداریکردنی براکانی کرد.


PUKMEDIA