زیاتر لە دوو هەزار خانەنشین پێنج مووچە وەردەگرن

PUKMEDIA

خانەنشینان

وەزارەتی دارایی و ئابوری حکومەتی هەرێمی کوردستان ئاشکرای دەکات:"زیاتر لە 10 هەزار مامەڵەی خانەنشین-یان تەواوکراوە و بۆ مانگی پێنجیش زیاتر لە دوو هەزار خانەنشینی دیكە ناوەکانیان داخڵی لیستی موچە دەکرێت و موچەی پێنج مانگیان بۆ خەرج دەکرێتەوە".

وەزارەتی دارایی و ئابوری هەرێمی كوردستان ئەمشەو لە ڕاگەیەندراوێكدا بڵاویكردەوە:" بەسەرپەرشتی ئاوات شێخ جەناب و ئامادەبوونی سەرجەم بەڕێوەبەرایەتییەکانی خانەنشین لە هەرێمی کوردستان، کۆبونەوەیەک لەسەر ڕاییکردنی مامەڵەی خانەنشینان بەڕێوەچوو".

ئاماژەی بەوەشكردووە:" لەبەشێکی دیكەی کۆبونەوەکەدا، دەرئەنجامی هەوڵەکان خرایەڕوو، کە توانراوە لەماوەی ڕابردوودا کاروبارەکانی مامەڵەی خانەنشینان خێراتر بکرێت و لەسەرەتای مانگی (شوبات/2)ـەوە تا ئێستا زیاتر لە 10 هەزارو 200 مامەڵەی خانەنشینیان تەواوکراوە و بۆ مانگی (ئایار/5) زیاتر لە دوو هەزار خانەنشینی دیكە ناوەکانیان داخڵی لیستی موچە دەکرێت و موچەی پێنج مانگیان بۆ خەرج دەکرێتەوە".

لە کۆتایشدا، وەزارەتی دارایی و ئابوری هەرێمی كوردستان، ئاماژەی بەوەکردووە:" وەزیری دارایی داوای کرد پەلەبکرێت لە دەرکردنی ڕێنمایی بۆ جێبەجێکردنی یاسای خانەنشینی یەکگرتوی عیراق لەسەر سەرجەم ئاستەکان و گواستنەوەی دۆسیەی خانەنشینانی سەربازی لە وەزارەتی پێشمەرگەوە بۆ سەر وەزارەتی دارایی".

PUKMEDIA