رەفعەت عەبدوڵا: پێویستە بەئەدەبیاتی مام یەکێتی پایەدارتر بکەین

نوسینگەی رۆژنامەوانی رەفعەت عەبدوڵا

کۆبوونەوەی رەفعەت عەبدوڵا لەگەڵ بۆردی پشتیوانی

رەفعەت عەبدوڵا جێگری سەرۆکی یەکێتیی نیشتمانیی کوردستان، دووشەممە 12ی5ی2025، لەگەڵ هەڤاڵانی بۆردی پشتیوانی کۆبووەوە.

لەکۆبوونەوەکەدا جێگری سەرۆکی یەکێتی ستایشی رۆڵی هەڤاڵ حاجی مەسیفی لێپرسراوی بۆردی پشتیوانی (ی.ن.ک) و هەڤاڵەکانی کرد و هەوڵەکانیانی بەپێزانینەوە بەرز نرخاند. 

هەڤاڵ رەفعەت عەبدوڵا باسی لەچوارچێوەی رێوشوێنەكانی رێكخستنەوەی ئۆرگانەكان کرد بەوجۆرەی ئەركە هەنووکەییەکان دەیخوازێت و ئەرکەکانی ئێستاو داهاتووی لەئۆرگانە جیاوازەکاندا بەپێوسیتیەکی گرنگ و ئێستایی وەسفکرد و رایگەیاند:"یەکێتی حزبی ئەرکە گەورەکانی کوردایەتییەو بەرپرسیاریەتی نیشتمانی و نەتەوەیی لەسەر شانە".

"برەودان بەتوانای کادران و پێگەیاندنیان بەپێی پێدراوە نوێیەکان بۆ باشتر جێبەجێکردنی ئەرکەکان پێوستییەکی ئێستای یەکێتییە و سەرمایەگوزاری لەتوانای کادرەکانمان دەکەین"، جێگری سەرۆکی یەکێتیی نیشتمانیی کوردستان  وای وت.

 رەفعەتی عەبدوڵا راشیگەیاند: یەکێتی و جەنابی سەرۆک مام جەلال لەخەباتی شاخەوە گرنگیان بەخول و  پێگەیاندنی کادر داوە، تاوەکو دواتر لەئۆرگانە جیاوازەکاندا خزمەتی یەکێتی و کوردستانی پێبکەن".

جێگری سەرۆکی یەکێتی لەمیانی قسەکانیدا ئاماژەی بۆ ئەوەکرد:" لەم قۆناغەدا ئەرکەکانی یەکێتی لەناو پرۆسەی سیاسی هەرێم و عیراق و ناوچەکەدا مێژویی و گرنگەو پێویستە بەکلتوری سەرۆک مام جەلال و بەئەدەبیاتی دەوڵەمەندی، لەرەوتی قۆناغی داهاتودا یەکێتی و کوردایەتی پایەدارتر بکەین".

هاوکات هەڤاڵانی بۆردی پشتیوانی بەگرنگی و پەرۆشیەوە باسیان لەرێکخستنەوەی ئۆرگانەکان کردو بەگفتوگۆی هەڤاڵانەو یەکێتیانە بەشدارییان لەکۆبونەوەکەدا کرد و جێگری سەرۆکی یەکێتی-ش هیوای خواست سود لەسەرمایەی مێژوویی پڕ شانازی یەکێتی وەربگرین و وەفاداری خەبات و تێکۆشانەکان بین هەتا لەقۆناغەکانی ئایندەشدا هەر یەکێتیەکەی کۆمەڵانی خەڵک و پێشڕەوی کوردایەتی بین.

PUKMEDIA