یاساى بە پارێزگابوونى هەڵەبجە لە رۆژنامەى وەقایع بڵاودەكرێتەوە

PUKMEDIA

پارێزگاى هەڵەبجە

سبەى یاساى بە پارێزگابوونى هەڵەبجە لە رۆژنامەى رەسمى وەقایعی عیراقی بڵاودەبێتەوە، بەمەش هیچ دڵەڕاوکێیەک نامێنێت، ئەندامێکى فراکسیۆنى یەکێتیش رایدەگەیەنێت: "هەوڵ و ماندووبونەکانمان ئەنجامى هەبووە ". 

چرۆ حەمە شەریف ئەندامى ئەنجوومەنى نوێنەرانى عیراق لە فراكسیۆنی یەكێتیی نیشتمانیى کوردستان بە وێبسایتى رەسمى یەکێتیى نیشتمانیى کوردستان PUKMEDIA ی راگەیاند:" ئەمڕۆ پاش پەیوەندیمان بە د.خالد شوانی وەزیری دادی عیراق سەبارەت بە تەواوكردنی رێکارەکانی بەپارێزگابوونی هەڵەبجە و دەستوبرد کردن لێی،  د.خالید پێیڕاگەیاندین، سبەی 5-5-2025 لە رۆژنامەی رەسمى وەقایعی عیراقی یاسای بەپارێزگابوونی هەڵەبجە بڵاودەبێتەوە، بەمەش هیچ دڵەڕاوکێیەک لەسەر یاساکە نامێنێت و هەوڵ و ماندووبوونمان  بەرهەمی تەواوی دەبێت ".

" سوپاس هەموو ئەو كەس و لایەنانە دەكەین کە خەمخۆرانە کاریان لەسەر کەیسی بە پارێزگا بوونی هەڵەبجە کردووە " چرۆ حەمەشەریف واى وت.

 رۆژى 14ى 4ى 2025 ئەنجوومەنى نوێنەرانى عیراق کۆبوونەوەى کرد، کە تییدا 178 ئەندام بەشدارى کرد و لەو کۆبوونەوەیەدا دەنگ لەسەر پڕۆژەیاسای بە پارێزگابوونى هەڵەبجە درا و هەڵەبجە بووە 19هەمین پارێزگای عیراق.

PUKMEDIA