ئەنجومەنی نوێنەرانی عیراق دوو دانیشتن ئەنجام دەدات

PUKMEDIA

ئەنجوومەنى نوێنەرانى عیراق

بڕیارە رۆژی دووشەممە و سێشەممەی داهاتوو ئەنجوومەنی نوێنەرانی عیراق کۆببێتەوە و دەنگ لەسەر چەند پرۆژە یاسەیەک بدات و خوێندنەوەش بۆ چەند پرۆژە یاسایەکی دیکە بکات.

د.بڕیار رەشید ئەندامى ئەنجومەنى نوێنەرانى عیراق لە فراکسیۆنى یەکێتیى نیشتمانیى کوردستان بە PUKMEDIAى راگەیاند:"بەرنامەی کاری دانیشتنی رۆژی دووشەممە و سێشەممەی داهاتوو هەر رۆژەو حەوت بڕگە لەخۆدەگرن".

"لە دانیشتنی رۆژی دووشەممە 5ى ئایارى2025 دەنگ لەسەر دوو پرۆژە یاسا دەدرێت و هاوکات پێنج پرۆژە یاسای دیکە خوێندنەوەی بۆ دەکرێت، هەروەها لە دانیشتنی رۆژی سێشەممە 6ى ئایارى2025 دەنگ لەسەر سێ پرۆژە یاسا دەدرێت و چوار پرۆژە یاسای دیکە خوێندنەوەی بۆ دەکرێت"، د.بڕیار رەشید وایوت.

ئەمەش لەکاتێکدایە رۆژى 14ى نیسانى2025 لە کۆتا دانیشتنی مانگی نیساندا، ئەنجوومەنى نوێنەرانى عیراق لەدانیشتنێکدا دەنگی لەسەر بە پارێزگابوونى هەڵەبجە دا و رۆژی 29 ی نیسانی 2025، د.لەتیف جەمال رەشید سەرۆككۆماری عیراق لەمیانی رێوڕەسمێكی تایبەتدا بەئامادەبوونی ژمارەیەك لەئەندامانی ئەنجومەنی نوێنەران و بەرپرسان و نوێنەرانی كەسوكاری شەهیدانی كیمیابارانی هەڵەبجە، لەکۆشکی بەغدا مەرسومی كۆماری بۆ دامەزراندنی پارێزگاكە دەركرد.


PUKMEDIA