یاسای بە پارێزگابوونی هەڵەبجە رەوانەی سەرۆکایەتی کۆمار کرا

PUKMEDIA

پارێزگای هەڵەبجە

یاسای بە پارێزگابوونی هەڵەبجە رەوانەی سەرۆکایەتی کۆمار کرا بەمەبەستی پەسند کردنی لەلایەن سەرۆککۆمارەوە.

چرۆ حەمە شەریف ئەندامی ئەنجومەنی نوێنەرانی عیراق لە فراکسیۆنی یەکێتی بە PUKMEDIA ی راگەیاند:" لەلایەن سەرۆکایەتی ئەنجومەنی نوێنەرانەوە یاسای بەپارێزگابوونی هەڵەبجە ئاراستەی سەرۆکایەتی کۆمار کراوە، بەمەبەستی پەسەند کردنی یاساکە".

دوای پەسندکردنیشی بە رەسمی لە رۆژنامەی وەقائعی عیراقی بڵاودەکرێتەوە و رێکارەکانی بە پارێزگابوونی هەڵەبجە کۆتایی دێت.


هاوکات بەپێی نەخشەیەك كە وەزارەتی پلاندانانی عیراق پەسندی كردوە، سنووری پارێزگای هەڵەبجەی وەك 19هەمین پارێزگای عیراق كە رۆژی 14-4-2025، پەرلەمانی عیراق یاساكەی پەسندكرد، دیاری كراوە.

لەو بارەیەشەوە، كاروان یاروەیس بڕیاردەری فراكسیۆنی یەكێتی لە ئەنجومەنی نوێنەرانی عیراق، بەوێبسایتی رەسمی یەكێتیی نیشتمانیی كوردستان PUKMEDIA ی راگەیاند: "بەپێی نەخشەكە لەلایەن د. محەمەد تەمیم وەزیری پلاندانانی عیراق و بەڕێوەبەرایەتی و بەشە پەیوەندارەكانی وەزارەتەكەوە ئیمزا كراوە، سنووری پارێزگاكە ناحیەكانی سیروان، خورماڵ، بیارە و بەمۆ دەگرێتەوەو قەزای هەڵەبجەش ناوەندی پارێزگاكەیە".

"سنووری دەرەوەی پارێزگاكە هەمووی بە كۆماری ئیسلامی ئێرانەوەیەو لەناوخۆش هاوسنووری پارێزگاكانی سلێمانی و دیالەیە" كاروان یاروەیس وادەڵێت.

راشیگەیاند: "لەخشتەكەدا هێشتا خورماڵ وەك ناحیە ناوی هاتووە هەرچەندە لەلایەن حكومەتی هەرێمەوە كراوە بە قەزا".



PUKMEDIA