کۆمسیۆن: نزیکەی 700 هەزار دەنگدەر تۆماریان نوێکردووەتەوە

PUKMEDIA

پرۆسەی هەڵبژاردن

ئامادەکارییەکان بۆ ئەنجامدانی هەڵبژاردنی خولی شەشەمی ئەنجومەنی نوێنەرانی عیراق بەردەوامە، کە بڕیارە 11ی تشرینی دووەمی ئەمساڵ بەڕێوەبچێت، وتەبێژی کۆمسیۆنیش رایدەگەیەنێت:" ژمارەی ئەو دەنگدەرانەی تا دوێنێ داتاکانیان نوێکردووەتەوە گەیشتووەتە 672 هەزار و 180 دەنگدەر، هاوکات تا ئێستا هیچ بڕیارێکیش بۆ درێژکردنەوەی ماوەی نوێکردنەوەی تۆماری دەنگدەران نەدراوە".

جومانە غەلای وتەبێژی کۆمسیۆنی باڵای سەربەخۆی هەڵبژاردنەکان بەوێبسایتی رەسمیی یەکیتیی نیشتمانیی کوردستان PUKMEDIA ی راگەیاند:" پرۆسەی نوێکردنەوەی تۆماری دەنگدەران کە لە 25ی ئازاری ئەمساڵەوە دەستیپێکردووە و بەپێی بڕیاری دەستەی کۆمیسارانی کۆمسیۆنی هەڵبژاردنەکان بۆ ماوەی مانگێک بەردەوام دەبێت، ژمارەی ئەو دەنگدەرانەی بەمەبەستی نوێکردنەوەی داتاکانیان سەردانی ناوەندەکانی کۆمسیۆنیان کردووە تا دوێنێ یەکشەممە 20-4-2025 گەیشتووەتە 672 هەزار و 180 دەنگدەر".

" تا ئێستا هیچ بڕیارێک بۆ درێژکردنەوەی ماوەی نوێکردنەوەی تۆماری دەنگدەران نییە، ئەگەر بڕیارێک بۆ درێژکردنەوەی هەبێت پێویستە لەلایەن سەرۆک و ئەندامانی ئەنجومەنی کۆمسیارانی کۆمسیۆنەوە بڕیاری لێبدرێت"، جومانە غەلای وایوت.  

جومانە غەلای ئاماژەی بەوەشکرد:" کۆمسیۆن بەردەوامە لە ئامادەکارییەکانی بۆ ئەنجامدانی هەڵبژاردن لەو وادەیەی دیاریکراوە".

ئەمەش لەکاتێکدایە، رۆژی 9ی نیسانی 2025 ئەنجومەنی وەزیرانی عیراق دانیشتنێکی بە سەرۆکایەتی محەمەد شیاع سودانی سەرۆکوەزیرانی عیراق ئەنجامدا، لە میانی دانیشتنەکەشدا دەنگی دا بە دیاریکردنی رۆژی 11ی تشرینی دووەمی 2025، وەک وادەی ئەنجامدانی هەڵبژاردنی خولی شەشەمی ئەنجوومەنی نوێنەرانی عیراق".

هاوکات 10ی تشرینی یەکەمی 2021 هەڵبژاردنی خولی پێنجەمی ئەنجومەنی نوێنەرانی عیراق بەڕێوەچوو تێیدا 329 ئەندام بۆ ئەنجومەنەکە هەڵبژێردران.

PUKMEDIA