سەرۆک و سەرکردەکان لە دیداری سلێمانی وتاریان هەیە

PUKMEDIA

دیداری سلێمانی

ئەمڕۆ 16ی4ی2025 نۆیەمین دیداری سلێمانی بەبەشداری بەرپرسانی هەرێمی کوردستان و عیراق و بەشێک لەوڵاتان دەستیپێکرد و تێدا باس لە گۆڕانکارییەکانی ناوچەکە و عیراق و هەرێم کرا.

لە دەستپێکی دیدارەکەدا، بیلال وەهاب سەرۆکی  زانكۆی ئەمریكی لە عیراق – سلێمانی (AUIS) وتاری بەخێرهاتنی پێشکەش کرد و پاشان د. بەرهەم ئەحمەد ساڵح سەرۆکی ئەنجومەنی زانکۆ و سەرۆککۆماری پێشووی عیراق لە وتارێکیدا باسی لەو گۆڕانکاریانە کرد کە  لە سوریا روویانداوە لەگەڵ دەستپێکردنی پڕۆسەی ئاشتی لەتورکیا و دانوستانەکانی ئەمریکا و ئێران.

راشیگەیاند: "ناوچەکە بە کۆمەڵێک ئاڵنگاریدا تێدەپەڕێت، بەڵام گۆڕانکارییەکانیش دەرفەتێکن بۆ چارەسەر".

د.بەرهەم ساڵح: دەرفەتێکی نوێ بۆ واقیعێكی باشتر هاتووەتەپێشەوە

پاشان د. بەرهەم ئەحمەد ساڵح لە وتارێکیدا رایگەیاند: "ئاڵنگاری زۆر گه‌وره‌و مه‌ترسیدار هه‌ن كه‌ هاوكات ده‌رفه‌ت هه‌یه‌ بۆ واقیعێكی باشتر له‌وه‌ی ئێستادا تیایدا ده‌ژین، گرنگە پێکەوە لەم دیدارەدا گفتوگۆ  لەسەر ئەو پرسە گرنگانە بکەین".

ئاماژەی بەوەشکرد: "ئه‌و گۆڕانكاریانه‌ی لە ناوچەکەدا روویانداوە گوزارشت له‌ ده‌رفه‌تێكی نوێ ده‌كه‌ن، بۆ ئه‌وه‌ی له‌ قۆناغی توندوتیژی و مه‌ترسی كه‌ له‌ ده‌وروبه‌ری ئێمه‌دایه‌ بگۆڕدرێن بۆ واقعێكی نوێ، هەروەها ئه‌م ناوچه‌یه‌ به‌ نه‌هامه‌تی و ده‌یان ساڵ شه‌ڕ و پێكدادان له‌ نێوان وڵاتان و گه‌لان تێپه‌ڕیوه‌، كه‌ بووه‌هۆی له‌ناوبردن و به‌فیڕۆدانی سامانی ناوچه‌كه‌".

د. بەرهەم لە وتارەکەیدا باسی لەوەشکرد کە: "ئەرکی هەموومانە کار  بۆ رزگاربوونی عیراق لە جەنگ بکەین، هەروەها  خزمەتی نیشتیمانە ئەمڕۆ ئێمەی لەسلێمانی کۆکردووەتەوە".

سودانی: خۆم  بۆ سەرۆکوەزیرانی عیراق کاندید دەکەمەوە 

هەر لە دیدارەکەدا، محەمەد شیاع سودانی سەرۆکوەزیرانی عیراق  وتارێکی پێشکەش کرد و رایگەیاند: "خۆشحاڵم  ئەمڕۆ لەگەڵتانم، سلێمانی مێژوویەکی دێرینی لە دژایەتی زوڵم و زۆرداری هەیە".

راشیگەیاند: "ئێمە لە عیراق پێویستمان بە چاکسازییەکی گشتگیرو راستەقینە هەیە، له‌ماوه‌ی رابردوودا سیاسه‌تێكی ئابوری خراپ په‌یڕه‌وكراوه‌ و به‌ سه‌دان پڕۆژه‌ی ته‌وانه‌كراو بۆ ئه‌م حكومه‌ته‌ به‌جێهێڵدرا".

سەرۆکوەزیرانی عیراق ئاشکراشی کرد: "داهاتی گومرگەکان بە ڕێژەی 128% زیادیکردووە و رێژەی هەڵاوسانی ساڵانەش دابەزینی بەخۆیەوە بینیوە"، ئاماژەی بەوەشکرد: " لە ماوەی دوو ساڵی رابردوودا خزمەتی عیراقمان کردووە و دەستگیرۆیی گەنجانمان کردووە".

لە بارەی پەیوەندییەکانی نێوان عیراق و هەرێمیش سەرۆکوەزیرانی عیراق رایگەیاند: " گفتوگۆی نێوان عیراق و هەرێم بۆ یەکەمجار  چووەتە قۆناغی تەکنیکی و یاساییە و یاسای نەوت و غازیش بووەتە پێویستییەکی بەپەلە، هەروەها  ئێستا لە هەموو کات زیاتر پەیوەندییەکانی  حکومەتی هەرێم و عیراق پتەوترە".

 ئاشکراشی کرد: "خۆم  بۆ سەرۆکایەتی وەزیرانی عیراق کاندید دەکەمەوە".

 لە کۆتایشدا رایگەیاند: "هەوڵی بە ئەلیکترۆنی کردنی حکومەت دەدەن و  دەستوەردانیش لە هیچ وڵات و لایەنێک قبوڵ ناکەن و مانەوەی هێزەکانی هاوپەیمانانیش تەنها بۆ کاری راوێژکارییە".

نێچیرڤان بارزانی: هەرێمی کوردستان فاکتەری ئاشتی بووە بۆ ناوچەکە

دواتر نێچیرڤان بارزانی سەرۆکی هەرێمی کوردستان لە وتارێکیدا رایگەیاند: "خۆشحاڵم ئەمڕۆ لە شاری سلێمانی خۆشەویست و دێرینم و بەشدارم لە  دیداری سلێمانیدا و دڵنیاشم دیدارەکە دەرئەنجامی باشی دەبێت".

راشیگەیاند: "گۆڕانکارییەکانی ناوچەکە  سروشتی پەیوەندی وڵاتان دەگۆڕێت و کاریگەرییان لەسەر ناوچەکەمان دەبێت".

لە بارەی گۆڕانی کەشوهەواوە، سەرۆکی هەرێمی کوردستان ئاشکرای کرد: "کاریگەرییە خراپییەکانی کەشوهەوا بە روونی لە عیراق دەرکەوتووە، هەروەها هەزارەها کەس بەهۆی کەمبوونەوەی ئاو ناچار بوون ناوچەکانیان جێبهێڵن".

 راشیگەیاند: "لە ناوچەکەدا پەرەسەندنی ئەرێنی دەبینین  لە تورکیا پڕۆسەی  ئاشتی  دەستپێکردووە و  لاپەڕەیەکی نوێی بونیاتنەرانەیە و گەلی کوردستانیش ئاشتیخوازن، ئاشتی هێزەو  لە ئاشتیدا هەموومان سەردەکەوین".

سەرۆکی هەرێمی کوردستان ئاماژەی بەوەشکرد: "هەموو لایەک کۆکین لەسەر ئەوەی کە پرسی کورد  لە سوریا بە ئاشتی چارەسەربکرێت و پێویستە حکومەتی سوریا رەنگدانەوەی هەموو پێکهاتەکان بێت".

راشیگەیاند: "هەرێمی کوردستان فاکتەری ئاشتی بووە بۆ ناوچەکە، گەشەکردنی هەرێم کوردستان وەک بەشێک لە عیراق پەیوەستە بە سەقامگیری عیراقەوە، چونکە پشتگوێخستنی هەرێمی کوردستان جگە لە شەڕو ئاشوب و دواکەوتن هیچ ئەنجامێکی نابێت".

 سەرۆکی هەرێم راشیگەیاند: "پابەند بوونی جێگیرمان بە دەستوور دووپاتدەکەینەوە، پابەندین بە گفتوگۆی بنیاتنەرانە لەگەڵ حکومەتی عیراق".

 لە کۆتایشدا داوای کرد پەرلەمانی کوردستان زوو کارا بکرێت لەو بارەیەوە رایگەیاند: "پێویستە پەرلەمانی کوردستان کارا بکرێت و هەرچی زووترە کابینەی نوێی حکومەتی هەرێم پێکبهێنرێت".

محەمەد حەسان: کارەکانی یۆنامی لە عیراق ئەمساڵ کۆتایی دێت

محەمەد حەسان نوێنەری تایبەتی سکرتێری گشتی نەتەوەیەکگرتووەکان لە عیراق لە وتارێکیدا رایگەیاند: "عیراق دەستی بە چاکسازی کردووە و ئێمەش پاڵپشتی دەکەین، گرنگە لەو گۆڕانکاری و جەنگانە دووربخرێتەوە کە لە ناوچەکە روودەدەن".

ئاماژەی بەوەشکرد: "دەبێت پڕۆژەی تایفی لەعیراق کۆتایی بێت و رێز لە پێکهاتەکان بگیرێت".

لە کۆتایشدا ئاشکرای کرد:"کارەکانی یۆنامی لەعیراق ئەمساڵ کۆتایی دێت  و عیراق  چیتر پێویستی بە نێردەی نەتەوەیەکگرتوەکان نابێت، ئەو وڵاتە پێویستی بە خزمەتگوزاری هەیە".

عەممار حەکیم : لەگەڵ هەمواری یاسای هەڵبژاردندا نین

عەممار حەکیم سەرۆکی رەوتی حیکمە لە پانێڵێکدا رایگەیاند: "عیراق لە 20 ساڵی رابردوودا رۆڵی گەورەی لە ناوچەکەدا هەبووە، بەڵام گرنگە  خۆی لە کێشمەکێشەکانی ناوچەکە دووربخاتەوە".

 لە بارەی دانوستانی نێوان ئەمریکا و ئێرانیش، عەمار حەکیم رایگەیاند: " گفتوگۆ باشترین بژاردەی وڵاتانە، هەروەها باوەڕ ناکەم بیانەوێت بکەونە جەنگەوە".

 لە کۆتایشدا رایگەیاند: "لەگەڵ هەمواری یاسای هەڵبژاردندا نین".