چرۆ حەمەشەریف: یەكدەنگی فراكسیۆنە كوردستانییەكان هەڵەبجەی كردە پارێزگا

PUKMEDIA

كۆنگرەی رۆژنامەوانی فراكسیۆنە كوردستانییەكان

چرۆ حەمە شەریف ئەندامی فراكسیۆنی یەكێتی، بەناوی فراكسیۆنە كوردستانییەكانی ئەنجومەنی نوێنەرانەوە رایگەیاند: "ئەمڕۆ رۆژێكی مێژووییە بۆ كوردو هەڵەبجەییەكان و دڵخۆشین بە یەكدەنگی فراكسیۆنە كوردستانییەكان، توانیمان هەڵەبجە بكەینە 19 هەمین پارێزگای عیراق".

بەبۆنەی پەسندكردنی پڕۆژەیاسای بەپارێزگابوونی هەڵەبجەوە، فراكسیۆنە كوردستانییەكان لە ئەنجومەنی نوێنەرانی عیراق كۆنگرەی رۆژنامەوانیان ئەنجامداو چرۆ حەمە شەریف ئەندامی ئەنجومەنی نوێنەرانی عیراق لەفراكسیۆنی یەكێتیی نیشتمانیی كوردستان بەناوی فراكسیۆنە كوردستانییەكانەوە، لەكۆنگرەیەكی رۆژنامەوانیدا لەناو هۆڵی پەرلەمانی عیراق رایگەیاند: "ئەمڕۆ رۆژێكی مێژووییە بۆ هەموو كوردو هەڵەبجەییەكان، كەسەرەڕای ماتەمینیمان بۆ یادی ئەنفال، هاوكات دڵخۆشین توانیمان هەڵەبجە بكەینە 4 هەمین پارێزگای هەرێم و 19 هەمین پارێزگای عیراق".

راشیگەیاند: "ئەگەر یەكدەنگی فراكسیۆنە كوردستانییەكان نەبووایە، نەماندەتوانی پڕۆژەیاسای بەپارێزگابوونی هەڵەبجە تێبپەڕێنین بۆیە دەستخۆشی لە هەموو ئەو پەرلەمانتارانە دەكەین كە ئەمڕۆ لەهۆڵی پەرلەمان بۆ تێپەڕاندنی پڕۆژەیاسای بەپارێزگابوونی هەڵەبجە لەگەڵماندابوون".

ئەمڕۆ دوو شەممە 14-4-2025، بەئامادەبوونی فراكسیۆنە كوردستانییەكان و چەند پەرلەمانتارێكی دیكەی عیراق، پڕۆژەیاسای بەپارێزگابوونی هەڵەبجە لەئەنجومەنی نوێنەرانی عیراق پەسندكراو هەڵەبجە بوو بە 19 هەمین پارێزگای عیراق.

ئەمەش لەكاتێكدایە رۆژی 13ی 3ی 2014 بە رەسمی لەلایەن حكومەتی هەرێمی كوردستانەوە وەك چوارەم پارێزگای كوردستان ناسێندرا و بووە چوارەم پارێزگا لەدوای هەولێر و سلێمانی و دهۆك، هەروەها پارێزگای 19هەمینە لەسەر ئاستی عیراق.

پارێزگای هەڵەبجە، یەك قەزاو چوار ناحیە لەخۆ دەگرێت، لەوانە سیروان و خورماڵ و بیارە و بەمۆ، هەروەها لە 166 گوند پێكدێت.


PUKMEDIA