هەڵەبجە بوو بە 19 هەمین پارێزگای عیراق

PUKMEDIA

هەڵەبجە

پڕ‌ۆژه‌یاسای به‌پارێزگابووونی هه‌ڵه‌بجه‌ له‌دانیشتنی ئه‌مڕ‌ۆی ئه‌نجومه‌نی نوێنه‌رانی عیراقدا تێپه‌ڕ‌ێندراو هه‌ڵه‌بجه‌ بووه‌ 19 هه‌مین پارێزگای عیراق.

چرۆ حه‌مه‌ شه‌ریف ئه‌ندامی ئه‌نجومه‌نی نوێنه‌رانی عیراق له‌فراكسیۆنی یه‌كێتیی نیشتمانیی كوردستان به‌وێبسایتی ره‌سمی یه‌كێتی PUKMEDIA ی راگه‌یاند: "ئه‌مڕ‌ۆ بۆ ئه‌نجومه‌نی نوێنه‌رانی عیراق رۆژێكی مێژوویی بوو كه‌توانی هه‌ڵه‌بجه‌ بكاته‌ 19 هه‌مین پارێزگای عیراق، به‌م بۆنه‌یه‌شه‌وه‌ پیرۆزبایی له‌خه‌ڵكی كورردستان به‌گشتی و هه‌ڵه‌بجه‌ییه‌كان به‌تایبه‌تی ده‌كه‌م و به‌رده‌وامده‌بم له‌خزمه‌تكردنی هه‌ڵه‌بجه‌ییه‌كان".

هه‌ر له‌و باره‌یه‌وه‌ به‌درییه‌ حسێن ئه‌ندامی ئه‌نجومه‌نی نوێنه‌رانی عیراق له‌فراكسیۆنی یه‌كێتی به‌ PUKMEDIA ی راگه‌یاند:" به‌هه‌وڵی فراكسیۆنی یه‌كێتی و سه‌رجه‌م فراكسیۆنه‌ كوردستانییه‌كان توانیمان ده‌نگی پێویست بۆ به‌پارێزگابوونی هه‌ڵه‌بجه‌ كۆبكه‌ینه‌وه‌و هه‌ڵه‌بجه‌ بكه‌ینه‌ 19 هه‌مین پارێزگای عیراق".

بڕیار ره‌شید ئه‌ندامی ئه‌نجومه‌نی نوێنه‌رانی عیراق له‌فراكسیۆنی یه‌كێتی به‌ PUKMEDIA ی راگه‌یاند:" هه‌ڵه‌بجه‌ییه‌كان شایه‌نی خزمه‌تی زیاترن و ئه‌وه‌شی بۆمان كردوه‌ كه‌مترین خزمه‌ته‌ بۆ ئه‌و قوربانییه‌ زۆره‌ی كه‌ خه‌ڵكه‌كه‌ی داویانه‌".

 ئه‌مه‌ش له‌كاتێكدایه‌ رۆژی 13ی 3ی 2014 به‌ ره‌سمی له‌لایه‌ن حكومه‌تی هه‌رێمی كوردستانه‌وه‌ وه‌ك چواره‌م پارێزگای كوردستان ناسێندرا و بووه‌ چواره‌م پارێزگا له‌دوای هه‌ولێر و سلێمانی و دهۆك، هه‌روه‌ها پارێزگای 19هه‌مینه‌ له‌سه‌ر ئاستی عیراق.

پارێزگای هه‌ڵه‌بجه‌، یه‌ك قه‌زاو چوار ناحیه‌ له‌خۆ ده‌گرێت، له‌وانه‌ سیروان و خورماڵ و بیاره‌ و به‌مۆ، هه‌روه‌ها له‌ 166 گوند پێكدێت.


PUKMEDIA