كۆمسیۆن وادەی تۆماركردنی ناوی حزب و كاندیدەكانی پەسند كرد

PUKMEDIA

كۆمسیۆنی باڵای سەربەخۆی هەڵبژاردنەكانی عیراق

كۆمسیۆنی باڵای هەڵبژاردنەكانی عیراق وادەی تۆماركردنی هاوپەیمانێتی و حزب و لیست و كاندیدە تاكەكانی بۆ هەڵبژاردنی ئەنجومەنی نوێنەرانی عیراق پەسند كرد.

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "ئەنجومەنی كۆمسیارانی كۆمسیۆن لەكۆبوونەوەی ئەمڕۆیدا وادەی تۆماركردنی ناوی حزب و كاندیدەكانی پەسند كردو بڕیاریشیدا ئەو لایەنانەی دەیانەوێت خۆیان بناسێنن و بەشداری لەهەڵبژاردندا بكەن، پێویستە لە ئەمڕۆوە 13-4-2025، تاوەكو سبەینێ 14-4-2025، بەشداریكردنیان لە هەڵبژاردنی ئەنجومەنی نوێنەران رابگەیەنن". 

پێشتریش بەپێی نووسراوێك كە لە فەرمانگەی هەڵبژاردنەكانی كۆمسیۆنی باڵای سەربەخۆی هەڵبژاردنەكانی عیراق-ەوە دەرچووە و وێنەیەكی بۆ PUKMEDIA نێردراوە: "كۆمسیۆن رۆژی 15/4/2025  تاوەكو 4/5/2025 دیاریكرد بۆ تۆماركردنی هاوپەیمانێتی و حزب و لیست و كاندیدە تاكەكان كە ئارەزووی بەشداریكردنییان لە هەڵبژاردنی ئەنجومەنی نوێنەرانی عیراق-دا هەیەو ئەمڕۆش ئەنجومەنی كۆمسیاران بڕیارەكەی پەسند كرد".

ئەمەش لەكاتێكدایە رۆژی پێنجشەممە 9-4-2025 نوسینگەی راگەیاندنی سەرۆكی ئەنجومەنی وەزیرانی عیراق رایگەیاند: "ئەنجومەنی وەزیران كۆبوونەوەیەكی بە سەرۆكایەتی محەمەد شیاع سودانی سەرۆكی ئەنجومەنی وەزیران ئەنجامدا و بڕیاریدا رۆژی 11-11-2025   هەڵبژاردنی ئەنجومەنی نوێنەرانی عیراق ئەنجامبدرێت".

هاوكات جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "كۆمسیۆن ئامادەیە لەو وادەیەی كە ئەنجومەنی وەزیران بۆ ئەنجامدانی هەڵبژاردنی ئەنجومەنی نوێنەران دیاریكردووە پڕۆسەی هەڵبژاردن بەڕێوەببات".

ئەنجومەنی نوێنەرانی عیراق لە خولی پێنجەمیدایە كە لە 10-10-2021 هەڵبژاردنی بۆ كراوەو بە هەڵبژاردنی 329 ئەندام لە 9-1-2022 یەكەم دانیشتنی ئەنجام داوە، هاوكات ئامادەكاری دەكرێت بۆ ئەجامدانی هەڵبژاردنی خولی شەشەمی ئەنجومەنەكە.

PUKMEDIA

دەقی نووسراوەكەی ئەنجومەنی كۆمسیارانی كۆمسیۆنی باڵای سەربەخۆی هەڵبژاردنەكانی عیراق: