چین و ئەمریکا شەڕی باج و ئابووری دەکەن

PUKMEDIA

ئاڵای ئەمریکا و چین

پەکین و واشنتۆن شەڕی سەپاندنی باج و جەنگی ئابووری بەرامبەر یەکتر دەکەن، ئەم هەینییە کۆماری گەلی چین ، باجی گومرگی بەسەر کاڵاکانی ئەمریکا بۆ 125٪ بەرز کردەوە.

 ویلایەتە یەکگرتووەکانی ئەمەریکا رێژەی باجی بۆ سەر کاڵای چین بۆ 104% بەرزکردەوە و کۆماری گەلی چینیش رێژەی باجی بەسەر کاڵای ئەمریکی بەرزکردەوە بۆ 125% وەک وەڵامدانەوەی واشنتۆن و باجە گومرگیەکان ئەو وڵاتە.

دۆناڵد ترەمپ سەرۆکی ئەمریکا  رۆژی 9-4-2025  ئاشکرایکرد بۆ ماوەی 90 رۆژ باجە سەپێندراوەکەی لەسەر 75 دەوڵەت هەڵدەگرێت، بەوتەی سەرۆکی ئەمریکا ئەو وڵاتانە دەگرێتەوە کە  هیچ وەڵامێکی  تەعریفە گومرگییەکانی وواشنتۆنیان نەداوەتەوە.

دوو رۆژ دوای ئەو هەڵوێستەی ئەمریکا، پەکین نەک بێدەنگی هەڵنەبژارد بەڵکو ئەمڕۆ 11-4 رێژەی باجی سەرکاڵای هاوردەکراوی ئەمریکای بۆ 125% بەرزکردەوە. 

دۆناڵد ترەمپ لە بەرامبەردا چین بە تێکدانی بازاڕی جیهان تۆمەتبار دەکات و تەعریفەی گومرگی سەر وڵاتەکەی بۆ 125٪ بەرزدەکاتەوە، چەند رۆژێک دواتریش رێژەکەی بۆ 145٪ بەرزکردەوە، هەرچەندە پێشتریش رێژەکەی بۆ84% بەرزکردبووەوە. 
 
شی جینپینگ سەرۆکی کۆماری گەلی چین ، دوای  ئەو بڕیارە  داوای لە یەکێتی ئەوروپا کرد لەگەڵ پەکین دژی "زۆردارییەکانی" ئەمریکا بوەستنەوە، هەرچەندە وتیشی: "لە شەڕی تەعریفەی گومرگیدا هیچ کەس براوە نییە".
 
پەکین ئاشکرای کرد کە سەپاندنی باج و  دانانی تەعریفە  گومرگییەکان بازاڕی جیهانی تێکداوە.
 
وەزارەتی بازرگانی چینیش  لەو بارەیەوە دەڵێت:"زیادکردنی سەپاندنی و بەرزکردنەوەی باج لەلایەن ئەمریکا بەسەر وڵاتەکەمان، یاریکردنە بەژمارە بەبێ ئەوەی هیچ سوودێکی عەمەلی لەسەر ئابووری هەبێت".

کۆشکی سپی لە وەڵامی کۆماری گەلی چین بۆ بەرزکردنەوەی رێژەی باج لەسەر واشنتۆن  رایگەیاند:"  پەکین  بڕیاریداوە بە بێباکانە وەڵامی باجەکان بداتەوە".

PUKMEDIA/ ئاژانسە جیهانیەکان