کۆمسیۆن وادەی تۆمارکردنی ناوی حزب و کاندیدەکانی راگەیاند

PUKMEDIA

کۆمسیۆنی باڵای سەربەخۆی هەڵبژاردنەکانی عیراق

کۆمسیۆنی باڵای هەڵبژاردنەکانی عیراق کاتی تۆمارکردنی هاوپەیمانێتی و حیزب و لیست و کاندیدە تاکەکانی بۆ هەڵبژاردنی ئەنجومەنی نوێنەرانی عیراق دیاریکرد.

بەپێی نوسراروێک کە لە فەرمانگەی هەڵبژاردنەکانی کۆمسیۆنی باڵای سەربەخۆی هەڵبژاردنەکانی عیراق-ەوە دەرچووە و وێنەیەکی بۆ PUKMEDIA نێردراوە:" كۆمسیۆن رۆژی 15/4/2025  تاوەکو 4/5/2025 دیاریکردووە بۆ تۆمارکردنی هاوپەیمانێتی و حیزب و لیست و کاندیدە تاکەکان کە ئارەزووی بەشداریکردنییان لە هەڵبژاردنی ئەنجومەنی نوێنەرانی عیراق-دا هەیە".

رۆژی پێنجشەممە 9-4-2025 نوسینگەی راگەیاندنی سەرۆکی ئەنجومەنی وەزیرانی عیراق رایگەیاند: "ئەنجومەنی وەزیران کۆبوونەوەیەکی بە سەرۆکایەتی محەمەد شیاع سودانی سەرۆکی ئەنجومەنی وەزیران ئەنجامدا و بڕیاریدا رۆژی 11-11-2025   هەڵبژاردنی ئەنجومەنی نوێنەرانی عیراق ئەنجامبدرێت".

هاوکات جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "كۆمسیۆن ئامادەیە لەو وادەیەی كە ئەنجومەنی وەزیران بۆ ئەنجامدانی هەڵبژاردنی ئەنجومەنی نوێنەران دیاریكردووە پڕۆسەی هەڵبژاردن بەڕێوەببات".

ئەمەش لەکاتێکدایە، ئەنجومەنی نوێنەرانی عیراق لە خولی پێنجەمیدایە كە لە 10-10-2021 هەڵبژاردنی بۆ كراوەو بە هەڵبژاردنی 329 ئەندام لە 9-1-2022 یەكەم دانیشتنی ئەنجام داوە، هاوکات ئامادەكاری دەكرێت بۆ ئەجامدانی هەڵبژاردنی خولی شەشەمی ئەنجومەنەكە.

PUKMEDIA