رێبوار تەها: کەرکوک جێگەی هەموو حزب و پێکهاتەکان دەبێتەوە

PUKMEDIA

رێبوار تەها پارێزگاری کەرکوک

پارێزگاری کەرکوک رایدەگەیەنێت:" هەر حزب و لایەنێک دێتەوە بۆ شارەکە بەخێرهاتنەوەی دەکەین"، دەشڵێت:" کەرکوک جێگەی سەرجەم لایەن و پێکهاتەکانە".

رێبوار تەها پارێزگاری کەرکوک لەلێداوانێکی رۆژنامەوانیدا رایگەیاند:" کەرکوک جێگەی سەرجەم لایەن و پێکهاتەکانە و حکومەتەکەشی جێگەی هەموومانە و دەرگای ئیدارەی کەرکوک و ئەنجومەنی پارێزگا کراوەیە بۆ هەر پێکهاتەیەک بیەوێت بەشداری بکات و کەرکوک شارێکی گەورەیە و کەسمان لێ زیاد نییە".

"هەر حزب و لایەنێک دێتەوە بۆ شارەکە بەخێرهاتنەوەی دەکەین و بەخێربێتەوە سەرچاوان، وەک حکومەتی خۆجێیی کارئاسانیمان ئەنجامداوە بۆ گەڕانەوەی هەر حزب و لایەنێک و کردنەوەی هەر بارەگایەک"، رێبوار تەها وایوت.

پارێزگاری کەرکوک راشیگەیاند:" خزمەتگوزارییەکان هەموو گەڕەکەکانی شاری کەرکوک دەگرێتەوە و هیچ گەڕەکێک بێ بەش ناکەین لە خزمەتگوزاریی، چونکە حکومەتی ئێستای کەرکوک حکومەتی هەموو لایەن و پێکهاتەکانە بەبێ جیاوازی و خەڵکی کەرکوک دڵنیا دەکەینەوە کە ئێمە بۆ خزمەت هاتووین و سیاسەتی چەپکە گوڵەکەی سەرۆک مام جەلال لە کەرکوک جێبەجێدەکەین".

PUKMEDIA