بەڕێوەبەرە گشتییەكانی فەرمانگەی رێكخراوە ناحكومییەكان داوای دەستلەكاركێشانەوە دەكەن

PUKMEDIA

سەرجەم بەڕێوەبەرە گشتییەكانی فەرمانگەی رێكخراوە ناحكومییەكانی ئەنجومەنی وەزیران

لە ئەمڕۆوە بەڕێوەبەرە گشتییەكانی فەرمانگەی رێكخراوە ناحكومییەكانی ئەنجومەنی وەزیران بەهۆكاری بوونی  گەندەڵی دارایی و كارگێڕی و یاسایی لەفەرمانگەكەیان داوای دەستلەكاركێشانەوە دەكەن و راشیدەگەیەنن: "چەندین رێكخراو بە ئاشكرا كار بۆ هاوڕەگەزبازی لەكوردستان دەكەن".

ئەمڕۆ 6-4-2025، سەرجەم بەڕێوەبەرە گشتییەكانی فەرمانگەی رێكخراوە ناحكومییەكانی ئەنجومەنی وەزیران كە ژمارەیان شەش  بەڕێوەبەر بوو لە كۆنگرەیەكی رۆژنامەوانیدا رایانگەیاند: "بەهۆكاری بوونی گەندەڵی دارایی و كارگێڕی و یاسایی لە فەرمانگەكەمان، داوای دەستلەكاركێشانەوە لەپۆستەكانمان و گواستنەوەی راژەكانمان دەكەین، چونكە سەرۆكی فەرمانگە ناحكومییەكان چەندین گەندەڵی ئەنجامداوە".

راشیانگەیاند: "مانگانە چەندین ملیۆن دینار بەبێ بوونی بەڵگە و وەسڵێكی یاسایی بەهەدەر دەدرێت، كە لەسەر ئەو گەندەڵییانە بەڕێوەبەری دارایی یاداشتی داوەتە سەرۆكی فەرمانگە، هەروەها رێگری دەكرێت لەوەی كاری رێكخراوەكان بكرێت و بەڕێوەبەرایەتی بەدواداچوونی سڕكردوەو راپۆرتی دارایی ساڵانەی رێكخراوەكانی وەرنەگرتووە، ئەمەش وایكردووە چەندین ملیۆن دۆلار بەهەدرەبدرێت و پارەداركردنی تیرۆر ئەنجامبدرێت".


ئەوەشیان راگەیاند: "رێكخراوەكانی پێدانی قەرز لەهەرێمی كوردستان كە بەدەرن لە یاسا و ڕێنماییەكان قەرز بە زیاتر لە ڕێژەی یاسایی بە خەڵكی كوردستان دەدەن، بەوهۆیەوە دەیان ملیۆن دۆلاریان بە خەڵكداوە كە ئەو كارە جگە لەوەی دور لە كاری ڕێكخراوەیی پێشێلكاری یاسا لە هەرێمی كوردستان، هەروەها رێگە بە ڕێكخراوەكانی هاوڕەگەزبازی دەدرێت و نوسراوی نوێكردنەوەی مۆڵەت و هەوڵدان بۆ تۆماریكردنی ڕێكخراوی لەوشێوەیە لە هەرێمی كوردستان".

PUKMEDIA