عیماد ئەحمەد: بێ مەرج هاوكاری قەڵەمە ئازاو ئازادو بوێرەكانین

PUKMEDIA

عیماد ئەحمەد لێپرسراوی مەكتەبی راگەیاندن و هۆشیاری پێشوازی لەحەمەی حەمەسەعید وەزیری رۆشنبیری كرد

عیماد ئەحمەد لێپرسراوی مەكتەبی راگەیاندن و هۆشیاری پێشوازی لەحەمەی حەمەسەعید وەزیری رۆشنبیری هەرێم كردو لەدیدارێكدا لەتیف نێروەیی لێپرسراوی بۆردی راگەیاندن ئامادەبوو، لەبارەی  ئاستەنگەكانی بەردەم كاری میدیایی، هەموو ئەو پرسانەی هەڕەشەن بۆ ئاشتی كۆمەڵایەتی و گفتوگۆییان لەبارەوەكراو دووپات لە هەماهەنگی هەموو لایەنە پەیوەندیدارەكان كرایەوە بۆ پاراستنی بنەما سەرەكییەكانی كاری راگەیاندن و فراوانكردنی مەودای ئازادی رادەربڕین و كەمكردنەوە و نەهێشتنی ئەو هەڕەشانەی میدیا لەكاری پیشەیی دوردەخاتەوە .

لەدیدارەكەدا عیماد ئەحمەد روونیكردەوە، سیاسەتی یەكێتی روون و ئاشكرایە لەسەر هەموو ئەو پرسانەی پەیوەستن بە ئادابی گشتی و بەها كۆمەڵایەتییەكان و پاراستنی گیانی پێكەوەیی و برایەتی لەنێوان هەموو نەتەوەو پێكهاتەكاندا،  وەك هەمیشە  وتوشمانە  پشتیوان و داكۆكیكاری سەرسەختی ئازادی رادەربڕین و كاری میدیایی پیشەیی لەچوارچێوەی بنەماكانی رۆژنامەوانی و پاراستنی ئازادییە كەسییەكان دەبین  و بێ مەرج هاوكاری قەڵەمە ئازاو ئازاد و بوێرەكانیش دەبین  لەپێناو پێشخستنی هەرێمەكەمان و پاراستنی كۆڵەكەكانی دیموكراسی.  بۆ یە ئەركی هەمووانە لەبەرامبەر ئەو دیاردانەی دەبنە هۆی شێواندنی كولتوورەكەمان و دنەو هانی توندوتێژی و كوشتن و تێكدانی ئاسایشی كۆمەڵایەتیمان دەدەن بوەستینەوە و بە پرۆژەیەكی نیشتمانییەوەرووبەڕوویان بینەوە .

لەبەرامبەردا حەمەی حەمەسەعید پاڵپشتی و هاوكاری وەزارەتی رۆشنبیری بۆ هەموو ئەو هەوڵانە دەربڕی كە داب و نەریت و بەهاو رێسا پیشەییەكان لە هەرێم دەپارێزن و وتی: "ئەم دەستپێشخەرییەی مەكتەبی راگەیاندن و هۆشیاری جێگای دەست خۆشیمانە و بۆئەوەش سەرنج و پێشنیاری هەموو لایەنە پەیوەندیدارەكان لە میدیای لایەنەكان، مامۆستایانی زانكۆ و ئەكادیمی و رۆژنامەنووسان و دامەزراوە میدیاییەكان، سەنتەرو سەندیكاو  رێكخراوەكانی پەیوەست بەكاری راگەیاندن وەردەگرین و بەهەماهەنگی هەنگاوێك دەنێین كە لەخزمەتی پێشخستنی ئەزموونەكەمان و گەشەپێدانی كاری میدیایی بێت هەروەك سوپاسی ئەو راگەیاندكارانەشیكرد كە بەرپرسیارانەو پابەند بە پیشەكەیانەوە درێژە بەكاری خۆیان ئەدەن".

PUKMEDIA