بەغدا مووچەی مانگی ئازاری بۆ هەرێم نارد

PUKMEDIA

دراوی عیراقی

وەزارەتی دارایی عیراق بڕی  954  ملیار و 880 ملیۆن دیناری خستە سەر هەژماری وەزارەتی دارایی و ئابووری، بۆ مووچەی مانگی ئازاری مووچەخۆرانی هەرێمی كوردستان.

ئامانج رەحیم، سكرتێری ئەنجومەنی وەزیرانی هەرێم رایگەیاند: "دوای تەواوكردنی رێكارەكانی ناردنی تەموویلی مووچەی مانگی سێی فەرمانبەران و مووچەخۆرانی هەرێم، ئەمڕ‌ۆ بەغدا بڕ‌ی 954 ملیارو 80 ملیۆن و 467 هەزارو 779 دیناری بۆ مووچەی مانگی ئازاری خستە سەر هەژماری بانكی وەزارەتی دارایی و ئابووری هەرێم لە لقی هەولێری بانكی ناوەندی عیراق".

ئەمەش لەكاتێكدایە، سەرجەم رێكارەكانی ناردنی تەموویلی مووچە وەك تەموویلی مووچەی مانگی سێی مووچەخۆران و فەرمانبەران و خانەنشینانی هەرێمی كوردستان، لەلایەن وەزارەتی دارایی حكومەتی فیدراڵەوە تەواو كراو هەر ئەمڕ‌ۆش پارەكە خرایە سەر هەژماری بانكی وەزارەتی دارایی و ئابووری هەرێمی كوردستان لەلقی هەولێری بانكی ناوەندی عیراق كە بڕ‌ی 954 ملیارو 80 ملیۆن و 467 هەزارو 779 دینارە.

هاوكات سەرچاوەیەك لە وەزارەتی دارایی هەرێم بە PUKMEDIA ی راگەیاند:" هەر ئەمڕۆ لیستی مووچەی مانگی ئازاری مووچەخۆرانی هەرێم بڵاودەكرێتەوەو دەستبەدابەشكردنی مووچەی مانگی ئازاری مووچەخۆران دەكرێت و لەخانەنشینانەوە دەستپێدەكات و هەوڵدەدرێت پێش جەژنی رەمەزان مووچەی سەرجەم وەزارەتەكان دابەشبكرێت".

هه‌ر له‌و باره‌یه‌وه‌ وه‌زاره‌تی دارایی حكومه‌تی هه‌رێمی له‌ راگه‌یه‌نراوێكدا كه‌ كۆپیه‌كی ده‌ست PUKMEDIA كه‌وتووه‌، تێدا هاتووه‌:"سبه‌ی پێنج شه‌ممه‌ ( ٢٧ ی ئازاری ٢٠٢٥) ده‌ست به‌دابه‌شكردنی مووچه‌ی مانگی ئازار ده‌كرێت و ئه‌و مووچه‌خۆرانه‌ی له‌ ڕ‌ێی پرۆژه‌ی هه‌ژماری منه‌وه‌ مووچه‌ وه‌رده‌گرن ڕ‌استه‌وخۆ پاره‌ ده‌خرێته‌ سه‌ر هه‌ژماره‌كانیان و له‌ڕ‌ێگای كورته‌نامه‌وه‌ ئاگادار ده‌كرێنه‌وه‌، هه‌روه‌ها ئه‌و مووچه‌ خۆرانه‌شی به‌شێوه‌ی كاش مووچه‌ وه‌رده‌گرن، دوای گواستنه‌وه‌ی پاره‌ بۆ بانكه‌كان له‌ كه‌مترین ماوه‌دا، ڕ‌استه‌وخۆ ده‌ستبه‌دابه‌شكردنی مووچه‌كانیان ده‌كرێت".


PUKMEDIA