قوباد تاڵەبانی: پڕۆسەی پێکهێنانی حکومەت خێراتر بووە

نووسینگەی راگەیاندنی قوباد تاڵەبانی

قوباد تاڵەبانی و نیکۆلۆ فۆنتایا

قوباد تاڵەبانی، جێگری سەرۆکوەزیران بە جیا لەگەڵ هەر یەکە لە نیکۆلۆ فۆنتایا باڵیۆزی ئیتالیا و گلێن مایلز باڵیۆزی ئوسترالیا لە عراق کۆبووەوە و لە هەردوو کۆبوونەوەکەدا باس لە دواین بەرەوپێشچوونەکانی پرۆسەی پێکهێنانی کابینەی دەیەمی حکومەتی هەرێم کرا.

لە هەردوو کۆبوونەوەکەدا کە رۆژی چوارشەمە(19/3/2025) بەڕێوەچوون، قوباد تاڵەبانی روونی کردەوە لێکتێگەیشتنی زۆر باش لەنێوان پارتی و یەکێتی دروست بووە و لە دواین کۆبوونەوەشدا لەسەر رەشنووسی دیدگای هاوبەش بۆ حکومڕانی لە هەرێم رێککەوتوون. راشیگەیاند بەپێی ئەم دۆخە ئەرێنیەی دروست بووە، پرۆسەی پێکهێنانی حکومەت خێراتر بووە و گەشبینین لە ماوەیەکی نزیکدا حکومەتی داهاتووی هەرێم پێکبهێنرێت.

جێگری سەرۆکوەزیران ئاماژەی بەوەشدا هەردوو لایەنی پارتی و یەکێتی هاوڕان کە بەپێی ئەو دۆخەی لە ناوچەکەدا دەگوزەرێت و هەروەها بۆ جێبەجێکردنی داواکارییەکانی هاوڵاتییان، پێویستە حکومەتێکی بەهێز و کارا و یەکگرتوو پێبکبهێنرێت.

قوباد تاڵەبانی سوپاسی هەردوو وڵاتی ئیتاڵیا و ئوسترالیای کرد لە هاوکاریکردنی هەرێمی کوردستان لە رووبەڕووبوونەوەی تیرۆردا و داوایکرد بەوپێیەی هێشتا تیرۆر مەترسییەکی گەورەیە بۆسەر ئاسایش و سەقامگیری ناوچەکە، هەردوو وڵات بەردەوامبن لە هاوکارییەکانیان.

 PUKMEDIA