به‌هۆی بایكۆته‌وه‌ هه‌ڕه‌شه‌ی سزاو مووچه‌بڕین له‌په‌رله‌مانتاران ده‌كرێت

ئاژانسەکان

هۆڵی دانیشتنی ئەنجومەنی نوێنەرانی عیراق

محەمەد مەشهەدانی سەرۆکی ئەنجومەنی نوێنەرانی عیراق لەچاوپێکەوتنێکی تەلەفزیۆنیدا رایگەیاندووە:" بەهۆکاری ئەوەی زیاتر لەمانگێکە ئەنجومەنی نوێنەران بەهۆی ناکۆکی نێوان فراکسیۆنەکان لەبارەی یاسای حەشدی شەعبی کۆنەبوونەتەوە، بۆ ئەمەش هەوڵدەدەین مووچەی پەرلەمانتاران راگرین"، ئەندامێکی ئەنجومەنی نوێنەرانیش دەڵێت:" سەرۆکی ئەنجومەن دەسەڵاتی راگرتنی مووچەی پەرلەمانتارانی نییە".

لەبارەیەوە سەباح شێخ حەبیب ئەندامی ئەنجومەنی نوێنەرانی عیراق لەفراکسیۆنی یەکێتی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" هەرچەندە بەپێی یاسا سەرۆکی ئەنجومەنی نوێنەران دەسەڵاتی راگرتنی مووچەی پەرلەمانتارانی نییە، بەڵام ئێمە وەک فراکسیۆنی یەکێتی و تەنانەت فراکسیۆنە کوردستانییەکانی دیکەش بەشدارنیین لەو ناکۆکییە سیاسییەی کە لەسەر یاسای حەشدی شەعبییە و دانیشتنەکانی ئەنجومەنەکەی پەکخستووە".

" دەکرێت ئەو پەرلەمانتارانەی بەشداری کۆبوونەوەکان ناکەن و بایکۆتیان کردووە غیاب بدرێن و لەمووچەکانیان کەمبکرێتەوە، چونکە یاسایەکمان هەیە کەڕێگە دەدات ئەگەر هەر پەرلەمانتارێک لەدانیشتنێکدا بەبێ هۆکار ئامادەنەبێت، بڕی یەک ملیۆن دیناری لێببڕدرێت"،


ئەو ئەندامەی ئەنجومەنی نوێنەران راشیگەیاند:" پەرلەمانتار هەیە کەمترین بەشداری لە دانیشتنەکانی ئەنجومەنی نوێنەران هەیە و پێویستە رێککاری یاسایی لەگەڵیدا بگیرێتەبەر، بەڵام ئەندامانی فراکسیۆنە کوردستانییەکان بەگشتی بەشدارن لەکۆبوونەوەکان و غیابیان نییە".

زیاتر لە ٤٥ رۆژە بەهۆی یاسای حەشدی شەعبیەوە ناکۆکی کەوتووەتە نێوان فراکسیۆنە عیراقییەکان و بەوهۆیەشەوە دانیشتنەکانی پەرلەمان راگیراوە، هەرچەندە چەند جارێک لەلایەن سەرۆکایەتی ئەنجومەنەکەوە کاتی کۆبوونەوە دایریکراوە، بەڵام بەهۆی نەبوونی ژمارەی یاسایی ئامادەبوو کۆبوونەوەکە ئەنجام نەدراوە و سەرۆکی ئەنجومەنی نوێنەرانیش هەوڵەکانی بەردەوامە بۆ کۆتاییهێنان بەناکۆکی نێوان فراکسیۆنەکان و دەستپێکردنەوەی دانیشتنەکان.

PUKMEDIA