دابه‌شكردنی مووچه‌ كۆتایی هات و چاوه‌ڕێی مووچه‌ی ئازار ده‌كرێت

PUKMEDIA

دراوی عیراقی

دابەشکردنی مووچەی مانگی شوباتی مووچەخۆرانی هەرێم کۆتایی هات و وەزارەتی دارایی لیستی مووچەی مانگی ئازاری ئاڕاستەی بەغدا کرد، ئەمە جگە لەوەی ئەمڕۆ مووچەی مامۆستایانی گرێبەست دابەشدەکرێت.

بەپێی راگەیەندراوی وەزارەتی دارایی هەرێم دوێنێ ١٨-٣-٢٠٢٥ کۆتایی بەدابەشکردنی مووچەی مانگی شوبات هاتووە و بە چوار رۆژ مووچەی سەرجەم وەزارەتەکان دابەشکرا.

دارایی هەرێم لەڕاگەیەنراوێکی دیکەدا ئەوەی خستووەتەڕوو کە لەڕێی تیمی وەزارەتیانەوە لیستی مووچەی مانگی ئازاریان رەوانەی بەغدا کردووە و ئەمەش لەکاتێکدایە لەکۆبوونەوەی هەفتەی رابردووی ئەنجومەنی وەزیراندا، وەزیرەکان راسپێردران بەزووترین کات لیستی مووچەی مانگی ئازار ئامادەبکەن بۆ ئەوەی پێش جەژنی رەمەزان مووچەخۆران مووچەیەی ئەم مانگەش وەربگرن.

هاوکات ئەمڕۆ چوارشەممە ١٩-٣-٢٠٢٥ مووچەی مانگی شوباتی مامۆستایانی گرێبەستی وەزارەتی پەروەردە لە سنووری پارێزگای سلێمانی و مووچەی مانگی شوباتی ساڵی ٢٠٢٥و کرێی وانەبێژیی مانگی ئابی ساڵی ٢٠٢٤ی مامۆستایانی گرێبەستی وەزارەتی پەروەردە لە سنووری پارێزگای هەولێر و دهۆک دابەش دەکرێن.

PUKMEDIA