به‌هه‌وڵی فراكسیۆنی یه‌كێتی مووچه‌ی 25 هه‌زار زیندانی سیاسی ده‌خرێته‌ سه‌ر عیراق

PUKMEDIA

ئەنجومەنی نوێنەرانی عيراق، دراوی عيراقی

به‌هه‌وڵی فراكسیۆنی یه‌كێتی ئاماده‌كاری بۆ گواستنه‌وه‌ی ناوی 25 هه‌زار زیندانی سیاسی هه‌رێم ده‌كرێت بۆ وه‌زاره‌تی شه‌هیدانی عیراق و له‌و باره‌یه‌شه‌وه‌ ئه‌ندامێكی فراكسیۆنی یه‌كێتی له‌به‌غدا ده‌ڵێت: "زیندانیانی سیاسی هه‌رێم و عیراق وه‌ك یه‌ك ئه‌شكه‌نجه‌و ئازار دراون و ده‌بێت ماف و ئیمتیازاتیشیان یه‌كسان بێت".

چرۆ حه‌مه‌ شه‌ریف ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یەکێتیی نیشتمانیی کوردستان به‌ وێبسایتی PUKMEDIA ی راگه‌یاند: "هه‌وڵه‌كانی فراكسیۆنی یه‌كێتی بۆ به‌رژه‌وه‌ندی هاووڵاتیانی هه‌رێم به‌رده‌وامه‌و بۆ ئه‌و مه‌به‌سته‌ش له‌بانگهێشتی سه‌رۆكی ده‌سته‌ی زیندانیانی سیاسی عیراق بۆ دانیشتنی لیژنه‌ی شه‌هیدان و ئه‌نفالكراوان پێمانراگه‌یاند وه‌ك چۆن زیندانیانی سیاسی له‌عیراق ئازارو ئه‌شكه‌نجه‌ دراون، زیندانیانی هه‌رێمیش به‌هه‌مانشێوه‌ بووە بگره‌ زیاتریش، بۆیه‌ ده‌بێت هه‌مان ماف و ئیمتیازاتیان هه‌بێت و قه‌ره‌بوو بكرێنه‌وه‌ هه‌ر خۆشیان نا كه‌سوكاریشیان وه‌ك چۆن بۆ زیندانیانی سیاسی عیراق كراوه‌".

"له‌ئێستادا داوای گواستنه‌وه‌ی ناوی زیندانیانی سیاسی هه‌رێمی كوردستان كراوه‌ له‌ وه‌زاره‌تی شه‌هیدانی هه‌رێمه‌وه‌ بۆ عیراق و بۆ ئه‌و مه‌به‌سته‌ش له‌هه‌رێم ئاماده‌كاریی كراوه‌ بۆ گواستنه‌وه‌ی ناوه‌كانیان بۆ سه‌ر عیراق"، چرۆ حه‌مه‌شه‌ریف وایوت.

ئاماژه‌ی به‌وه‌شكرد: "زیندانیانی سیاسی هه‌رێم ژماره‌یان 25 هه‌زار زیندانی سیاسییه‌و ناویان له‌فایلی هه‌رێمی كوردستاندا تۆماره‌و رێكاره‌ یاسایی و ئیدارییه‌كانیان ته‌واو بووه‌، جگه‌له‌وه‌ش زیاتر له‌ 17 هه‌زار زیندانی سیاسی تریش هه‌ن كه‌ تائێستا رێكاره‌ یاسایی و ئیدارییه‌كانیان ته‌واو نه‌بووه‌".

ئه‌و ئه‌ندامه‌ی فراكسۆنی یه‌كێتی راشیگه‌یاند: "زیندانیانی سیاسی عیراق مووچه‌یان له‌سه‌روو ملیۆن و ٢٠٠ هه‌زاره‌و له‌گه‌ڵ زیندانیانی سیاسی هه‌رێم زۆر جیاوازییان هه‌یه‌، له‌كاتێكدا هه‌ردوولا له‌سه‌رده‌می رژێمی به‌عس وه‌ك یه‌ك ئازار و ئه‌شكه‌نجه‌ دراون، بۆیه‌ ده‌مانه‌وێت ئه‌م جیاوازییه‌ هاوتا بكه‌ینه‌وه‌و مووچه‌ی زیندانیانی سیاسی هه‌رێمیش وه‌ك عیراقی لێبكرێت".

PUKMEDIA