شێخ جەعفەر: هەنگاو بنرێت بۆ چارەسەرکردنی کێشەکان بەگفتوگۆ

ئەرشیف

شێخ جەعفەر شێخ مستەفا

جێگری سەرۆکی هەرێمی کوردستان بەبۆنەی ٣٤ ساڵ تێپەڕبوون بەسەر راپەڕین و ئازادکردنی شاری هەولێر، پەیامێک بڵاودەکاتەوە و رایدەگەیەنێت:" پیرۆزی یادی ڕاپەڕین و خەباتی شۆڕشگێڕیمان، بەرپرسیاریەتییەکی گەورە دەخاتە سەرشانی هەموومان، بە تایبەت بۆ ئەم قۆناغە هەستیار و پڕ لە قەیرانە سیاسیی و ئابوورییەی کە تێیکەوتووین، گرنگە لە ئێستادا بە یەکڕیزیی و کۆدەنگی نێوان لایەنە سیاسییەکان، هەنگاو بنرێت بۆ قۆناغی بەرەنگاربوونەوە و چارەسەرکردنی کێشەکان بە گفتووگۆ".


لەپەیامەکەدا شێخ جەعفەر شێخ مستەفا رایگەیاند:"ئەمڕۆ ٣٤ ساڵ تێپەڕ دەبێت بەسەر راپەڕین و ئازادکردنی شاری هەولێر، کە هاوتایە لەگەڵ ساڵیادی رێککەوتننامەی ١١ی ئازاری ١٩٧٠، لەم ڕۆژەدا شاری هەولێر بە پشتیوانی خەڵکە ئازا و پێشمەرگە قارەمانەکانی کوردستان، تاجی سەرکەوتنی ڕاپەرینی کردە سەر لە بەرامبەر ڕژێمی دیکتاتۆری بەعسیی فاشیزم، بەم بۆنەیەوە پیرۆزباییەکی گەرم لە کوردستانییانی ئازیز و خەڵکی سەربەرزی شاری هەولێر دەکەم".


"پیرۆزی یادی ڕاپەڕین و خەباتی شۆڕشگێڕیمان، بەرپرسیاریەتییەکی گەورە دەخاتە سەرشانی هەموومان، بە تایبەت بۆ ئەم قۆناغە هەستیار و پڕ لە قەیرانە سیاسیی و ئابوورییەی کە تێیکەوتووین، گرنگە لە ئێستادا بە یەکڕیزیی و کۆدەنگی نێوان لایەنە سیاسییەکان، هەنگاو بنرێت بۆ قۆناغی بەرەنگاربوونەوە و چارەسەرکردنی کێشەکان بە گفتووگۆ، لەپێناو بەدەستهێنانی مافە نەتەوەیی و دەستوورییەکان و فەراهەمکردنی ژیانێکی شایستە و خۆشگوزەران بۆ هاووڵاتیانی کوردستان"، لەپەیامەکەی شێخ جەعفەردا هاتووە.

هەر لەپەیامەکەدا جێگری سەرۆکی هەرێمی کوردستان ئاماژەوی بەوەشکرد:" لەم دوو یادە مەزنەدا، سەری ڕێز و وەفا بۆ سەرجەم شەهیدانی ڕێگای ئازادی کوردستان دادەنەوێنم. بەرز و شکۆدار بێت ساڵیادی ١١ی ئازاری ١٩٧٠ و ڕاپەڕین و ڕزگارکردنی شاری هەولێری پایتەختی هەرێمی کوردستان.

PUKMEDIA