لە کەرکوک فەوجێکی پۆلیس بۆ پاراستنی زەوییە کشتوکاڵییەکان پێکدەهێنرێت

PUKMEDIA

ئەنجومەنی پارێزگای كەركوك

بۆ جێبەجێكردنی یاسای گەڕانەوەی زەویوزاری جووتیاران بۆ خاوەنە راستەقینەكانیان لە کەرکوک فەوجێکی پۆلیس دروستدەکرێت و سەرۆکی لیژنەی کشتوکاڵی ئەنجومەنی پارێزگاکەش رایدەگەیەنێت:" فەوجەکە لە 500 کەس پێکدێت و چیتر سوپا دەستوەردان لە کاروباری جوتیاراندا ناکات".

عەبدوڵڵا میروەیس سەرۆکی لیژنەی کشتوکاڵ لە ئەنجومەنی پارێزگای کەرکوک له‌ لێدوانێكیدا به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگەیاند:" لەسەر داوای پارێزگاری كەركوك فەوجێكی پۆلیس بۆ پاراستنی زەویوزاری جووتیاران لە سەرجەم پێكهاتەكانی شارەكە پێكدەهێنرێت".

" وەزارەتی ناوخۆی عیراق رەزامەندیی لەسەر پێکهێنانی فەوجەکە دەربڕیوە و ئێستاش بەڕێوەبەرایەتیی پۆلیسی كەركوك سەرقاڵی رێكخستنی میلاكە، کە لە 500 کەس پێکدێت"، عەبدوڵڵا میروەیس وایوت.

دەربارەی ئامانج لە پێکهێنانی فەوجەکە و ئەرکەکانی، سەرۆکی لیژنەی کشتوکاڵ لە ئەنجومەنی پارێزگای کەرکوک رایگەیاند:" ئامانج لە پێکهێنانی بۆ ئەوەیە چیتر سوپا دەستوەردان لە كێشەی جووتیاراندا نەكات، هەروەها جێبەجێكردنی یاسای گەڕانەوەی زەویوزاری جووتیاران بۆ خاوەنە راستەقینەكانیان، ئەركی سەرەكیی فەوجەکە دەبێت و راستەوخۆش فەرمان لە دادگا و ئیدارەی كەركوك وەردەگرن".

PUKMEDIA