لەسەر داوای فراکسیۆنی یەکێتی هەڵدانەوەی گۆڕە بەکۆمەڵەکان خێراتر دەکرێت

PUKMEDIA

لۆگۆی یەكێتی، ئەنجومەنی نوێنەرانی عیراق

فراکسیۆنی یەکێتی لە ئەنجومەنی نوێنەرانی عیراق داوا دەکات  پەلە بکرێت لە هەڵدانەوەی گۆڕە بە کۆمەڵەکان و  پەرلەمانتارێکیش دەڵێت:" سەرۆکوەزیرانی عیراق رەزامەندی لەسەر داواکارییەکە دەربڕیوە".

سروه‌ محه‌مه‌د ئه‌ندامی ئه‌نجومه‌نی نوێنه‌رانی عیراق له‌فراكسیۆنی یه‌كێتیی نیشتمانیی كوردستان، به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی  راگه‌یاند: " کۆتا جار گۆڕێک لە سەماوە هەڵدرایەوە کە 150 رووفاتی تێدابوو، کە هەموویان ژن و منداڵ بوون، هەروەها گۆڕێکی زۆری دیکەش هەیە کە پێویستە پەلە بکرێت لە هەڵدانەوەیان".

" لە بارەی هەڵدانەوەی ئەو گۆڕانەی کە هەڵنەدراونەتەوە، داوام لە سەرۆکوەزیرانی عیراق کرد  ئەوانیش هەڵبدرێنەوە کە تازە دۆزراونەتەوە، ئەویش رەزامەندی نیشاندا و نوسراوێکی بۆ دەزگای شەهیدانی عیراق کرد، بەمەبەستی ئامادەکاری بۆ  هەڵدانەوەی گۆڕەکانی دیکە"، سروه‌ محه‌مه‌د وایوت.

 رۆژی ٢٢-١٢-٢٠٢٤ گۆڕێكی بەكۆمەڵ لە بیابانی تەل شێخیەی پارێزگای سەماوە دۆزرایەوە، كە  رووفاتی 150 ژن و منداڵی تێدابوو، هەروەها لە دوای روخانی رژێمی به‌عس ساڵی 2003 له‌ چه‌ند گۆڕێكی به‌كۆمه‌ڵدا ژماره‌یه‌ك روفاتی ئه‌نفالكراو له‌ناوچه‌ جیاوازه‌كانی عیراق ده‌رهێنراونه‌ته‌وه‌و له‌ پزشكی دادوه‌ری نمونه‌ی ئێسكیان لێ وه‌رگیراوه‌ ، تاكو له‌ داهاتوودا به‌ به‌راوردكردن له‌گه‌ڵ سامپڵی خوێنی كه‌سوكاری ئه‌نفالكراوان و به‌گوێره‌ی ئه‌و كۆده‌ی له‌سه‌ر كێلی گۆڕه‌كانه‌ دوای پشكنینی تاقیگه‌یی روفاته‌كان بناسرێنه‌وه‌.

PUKMEDIA