هەوڵدەدرێت پێش 16ی 3 دەنگ لەسەر بەپارێزگابوونی هەڵەبجە بدرێت

PUKMEDIA

مۆنۆمێنتی هەڵەبجە

فراکسیۆنی یەکێتی لە ئەنجومەنی نوێنەرانی عیراق هەوڵدەدات پێش 16ی3 دەنگ لەسەر پرۆژە یاسای بە پارێزگا بوونی هەڵەبجە بدرێت و ئەندامێکی ئەنجومەنەکەش ئاشکرای دەکات:" لە ساڵیادی کارەساتی کیمیابارانی هەڵەبجەدا دەروازەی شارەکە دەکرێتەوە".


چرۆ حەمە شەریف ئەندامی ئەنجومەنی نوێنەرانی عیراق لە فراکسیۆنی یەکێتی لە لێدوانێکیدا بەوێبسایتی رەسمی یەكێتیی نیشتمانیی كوردستان  PUKMEDIA ی راگەیاند:" لەگەڵ دەستپێکردنەوەی دانیشتنەکانی عیراق، جارێکی دیکە داوا دەکەینەوە پرۆژە یاسای بە پارێزگا بوونی هەڵەبجە بخرێتە بەرنامەی کارەوە، وەک فراکسیۆنی یەکێتی هەموو هەوڵێک دەدەین تێپەڕێندرێت و دەنگی لەسەر بدرێت".

" ئێمە لە هەوڵەکانمان بەردەوامین و لەگەڵ زۆربەی لایەنەکانی کۆبوونەوەمان هەبووە، بۆیە دەمانەوێت پێش 16ی3 پرۆژەکە تێپەڕێنرێت"، چرۆ حەمە شەریف وایوت.

لە بارەی کاتی کردنەوەی دەروازەی هەڵەبجەش، چرۆ حەمە شەریف  رایگەیاند:" دەروازەی هەڵەبجە بە بڕی دوو ملیۆن دۆلار دروستدەکرێت و  لە ئێستادا 95% کارەکانی تەواو بووە ، لە 16ی3دا دەکرێتەوە، بۆ کردنەوەشی بانگهێشتی محەمەد شیاع سودانی سەرۆکوەزیرانی عیراقمان کردووە".

ئەمەش لە کاتێکدایە، لەسەر داوای فراکسیۆنی یەکێتی، ساڵی رابردوو محەمەد شیاع سودانی سەرۆکوەزیرانی عیراق لە ساڵیادی کیمیابارانکردنی هەڵەبجەدا بڕی یەک ملیار دیناری وەک دیاری پێشەکەش بە هەڵەبجە کرد ، لەسەر داوای پارێزگار و قائیمقامی شارەکە پارەکە تەرخانکرا بۆ دروستکردنی پرۆژەی دەروازەی شار و  لە رۆژی 14-3-2024 به‌ردی بناغه‌ی پڕ‌ۆژه‌کە دانرا.

PUKMEDIA