شێخ جەعفەر: پەرەدان بەزمانی دایك ئەركێكی نیشتمانییەو پارێزەری ناسنامەی نەتەوەییمانە

ميدياكان

شێخ جەعفەر شێخ مستەفا جێگری سەرۆكی هەرێمی كوردستان

شێخ جەعفەر شێخ مستەفا لەڕۆژی جیهانی زمانی دایكدا دەڵێت: "بەشانازییەوە نەتەوەی كورد ئاخاوتن و دەربڕینی زمانی شیرینی كوردی پاراستووەو پەرەپێدانی زمانی دایك ئەركێكی نەتەوەیی و نیشتیمانیی و زانستییە، هەروەها فاكتەرێكی سەرەكی و بنچینەیی پاراستنی ناسنامەی نەتەوەییمانە".

شێخ جەعفەر شێخ مستەفا جێگری سەرۆكی هەرێمی كوردستان، لەڕۆژی جیهانی زمانی دایكدا پەیامێكی بڵاوكردەوەو رایگەیاند: "پیرۆزبایی لە نەتەوەی كورد و كوردستانییان و پێكهاتە نەتەوەییەكانی كوردستان و عیراق و گەلانی جیهان دەكەم، مەبەست لە دیاریكردنی ڕۆژی جیهانی زمانی دایك، هۆشیاریی و ناساندنی فەرهەنگی زمانەكانە لەسەر ئاستیی جیهاندا، ئێمەش وەك گەلانی جیهان خاوەن زمان و ئاخاوتنی تایبەت بە خۆمانین، بە شانازییەوە نەتەوەی كورد ئاخاوتن و دەڕبڕینی زمانی شیرینی كوردی پاراستووە، ئەمەش بۆتە پێناسە و ناسنامەی نەتەوەیی و دەوڵەمەندكردنی فەرهەنگ و شووناس و كلتووری كوردی، گرنگیدان بە نزیككردنەوەی زاراوە كوردییەكان و پاراستنی زمانی كوردی، گرنگیدانە بە فەرهەنگی زمانی كوردی و پتەوكردنی بنەمای یەكبوونی ڕۆحی نەتەوەییمان".

راشیگەیاند: "گرنگە دامەزراوە رۆشنبیریی و ئەكادیمییەكانی تایبەت بەم بوارە بەردەوام لەگەڵ شارەزایانی بواری زمانەوانی لە پرس و راوێژدابن و كار بۆ ناساندنی زمانی كوردی بكرێت لە ناوەندە ئەكادیمییەكانی جیهان، چونكە پەرەپێدانی زمانی دایك ئەركێكی نەتەوەیی و نیشتیمانیی و زانستییە، هەروەها فاكتەرێكی سەرەكی و بنچینەیی پاراستنی ناسنامەی نەتەوەییمانە".

جێگری سەرۆكی هەرێم وتیشی: "لەم یادەدا، سوپاس بۆ هەموو ئەو ڕۆشنبیر و كەسایەتیی و مامۆستایانەی كە بەردەوام و بە بایەخێكی زۆرەوە لە خەمی دەوڵەمەندكردنی فەرهەنگ و زمانی كوردی دابوونە ئەگەر بە ووشەیەكیش بووبێت".


PUKMEDIA