وەفدی ئیمراڵی: یەکێتی هەمیشە رۆڵی گرنگی لە پرۆسەی ئاشتیدا هەبووە

ئاژانسەکان

کۆنگرەی رۆژنامەوانی وەفدی ئیمراڵی

وەفدی ئیمراڵی بەسەرۆکایەتی خاتوو پەروین بوڵدان و سری سورەییا ئوندەر سەردانی مەزاری سەرۆک مام جەلال-یان کرد و  تاجە گوڵینەی رێز و وەفایان لەسەر گڵکۆکەی دانا و كەسكین بایندر رایگەیاند:" سەرۆک مام جەلال رۆڵی گەورەی هەبووە لەسەرخستنی پرۆسەی ئاشتی لەتورکیا".

پاشان لەکۆنگرەیەکی رۆژنامەوانیدا کەسکین بایندر ئەندامی وەفدی ئیمراڵی رایگەیاند:" بەڕێزەوە لەڕۆڵی سەرۆک مام جەلال لەپرۆسەی ئاشتی لەتورکیا دەڕوانین و ئەمڕۆش بافڵ جەلال تاڵەبانی و قوباد تاڵەبانی کەجێگرەوەی ئەون رۆڵی گرنگیان لە سەقامگیری و پرۆسەی ئاشتی لەباکوری کوردستان بینیوە".

راشیگەیاند:" لەگەڵ ئەوەی سوپاسی زۆرمان بۆ یەکێتیی نیشتمانیی کوردستان هەیە بەتایبەت سەرۆک بافڵ و قوباد تاڵەبانی و خاتوو شاناز، پشتگیری ئەوان بۆ پرۆسەی ئاشتی زۆر گرنگە و دەتوانین بڵێین ئەمڕۆ رۆژێکی گرنگە بۆ کوردان، کە پێکەوە پشتیوان لەئاشتی دەکەن و دووبارە هەڵوێستی خاتوو شاناز بۆ ئازادی ژن بە گرنگ هەڵدەسەنگێنین".

هەر لەکۆنگرەکەدا بایندر ئاماژەی بەوەشکرد:"لەسەر داوای رێبەری زیندانیکراو لە ئیمراڵی سەردانی باشوری کوردستانمان کردووە و لەگەڵ یەکێتیی نیشتمانیی کوردستان کۆبووینەتەوە، هەروەها داوای لێبوردنیش لەلایەنەکانی دیکە دەکەین، کە نەمانتوانی سەردانیان بکەین و لەگەڵیان کۆببینەوە، بەڵام لێرەوە سڵاوی رێبەری زیندانیکراویان پێدەگەیەنین".

ئەو ئەندامەی وەفدی ئیمراڵی جەختیشیکردەوە:"لەگەڵ ئەوەی سەردانەکەمان بۆ باشوری کوردستان سەرکەوتوو بوو سبەینێ لەگەڵ گەڕانەوەمان بۆ تورکیا ئەنجامی کۆبوونەوەکانمان لەگەڵ لایەنەکانی باشوری کوردستان دەخەینەڕوو، هەروەها دووبارەی دەکەینەوە رۆڵی سەرۆک مام جەلال و یەکێتیی نیشتمانیی کوردستان لەپرۆسەی ئاشتی تورکیا بەرزدەنرخێنین"

PUKMEDIA