سەرۆكی فراكسیۆنی یەكێتی: نابێت رووداوەكانی ئەمڕۆی سەرگەڕان بەبێ سزا تێپەڕببێت

PUKMEDIA

هەرێم كەمال ئاغا سەرۆكی فراكسیۆنی یەكێتی لە ئەنجومەنی نوێنەرانی عیراق

سەرۆكی فراكسیۆنی یەكێتی لەئەنجومەنی نوێنەران لەسەر دەستوەردانەكانی سوپای عیراق هاتە دەنگ و دەڵێت: "رووداوەكانی ئەمڕۆی سەرگەڕان نابێت بەبێ سزاو لێپرسینەوە تێپەڕببێت و پێویستە لێپرسینەوە لەفەرماندەو ئەو سەربازانە بكرێت"، هاوكات دڵنیایی دەداتە جوتیارانی كورد كەپشت ئەستور بەدەستوور و یاسا داكۆكیكارو پەرۆشیان دەبن و هەوڵەكانیان لەمڕوەوە دەست پێكردووە". 


هەرێم كەمال ئاغا سەرۆكی فراكسیۆنی یەكێتی رایدەگەیەنێت: "لەكاتێكدا چاوەروانی جێبەجێ كردنی یاسای گەڕانەوەی موڵك ماڵین بۆ خاوەنەكانیان كە ماوەیەك لەمەوبەر  ئەنجومەنی نوێنەرانی عیراق پەسندی كرد، كەچی بەداخەوە ئەمڕۆ دووشەممە ١٧ / ٢ / ٢٠٢٥ لەناوچەی سەرگەڕانی سەربە پارێزگای كەركوك رێگری لە جووتیارانی كورد كرا، كە زەوییەكانیان بكێڵن، لەوەش خراپتر هەندێك لەسەربازانی سوپای عیراق بەشێوەیەكی توندڕەوانەو دوور لەگیانی هاووڵاتی بوون و دەستور و یاسا بەركارەكان و مافی مرۆڤ پەلاماری جووتیارانی كوردیان داوە".

راشیدەگەیەنێت: "رووداوەكانی ئەمڕۆی سەرگەڕان و هەڵسوكەوتی نەشیاوی سوپا، مایەی نیگەرانی قووڵمانەو نابێت بەبێ سزاو لێپرسینەوە تێپەرببێت"، هەروەك داوا لەسەرۆكوەزیران دەكات وەكو فەرماندەی گشتی هێزە چەكدارەكانی عیراق، لێپرسینەوە بكات و فەرماندەو ئەو سەربازانەی سوپاش رووبەڕوی سزای سەربازی بكاتەوەو سوپا وەك سوپایەكی نیشتمانی بێلایەن هەڵسوكەوت بكەن و دووربخرێنەوە لەم جۆرە كێشانە".

هەرێم كەمال ئاغا سەرۆكی فراكسیۆنی یەكێتی لە ئەنجومەنی نوێنەرانی عیراق داوا لە جوتیارانی كوردیش دەكات، كە ساڵانێكی زۆرە ئارامیان گرتوە، ئەم ماوەیەش دان بەخۆیاندا بگرن تا یاسای گەڕاندنەوەی موڵك و ماڵ جێبەجێ دەكرێت، دڵنیاشیان دەكاتەوە پشت ئەستور بەدەستوور و یاسا داكۆكیكار و پەرۆشتان دەبین و هەوڵەكانمان لەمڕوەوە دەست پێكردوە". 


PUKMEDIA