بەهەوڵی فراکسیۆنی یەکێتی بەبازاڕکردنی بەرهەمە کشتوکاڵییەکانی هەرێم دەستپێدەکاتەوە

ئاژانسەکان

بەرهەمە کشتوکاڵییەکان

بەهەوڵی فراکسیۆنی یەکێتی لەئەنجومەنی نوێنەرانی عیراق و وەزیری کشتوکاڵی هەرێم و وەزارەتی کشتوکاڵی عیراق، بڕیاردرا هەناردەکردنی بەرهەمی کێڵگە و پڕۆژە پەلەوەرییەکان  و ناردنی گۆشتی مریشک و هێلکە و دووبارە ناردنی بۆ ناوەڕاست و خوارووی عیراق بەبێ بەرزبوونەوەی نرخەکەی دەستپێبکاتەوە و ئەندامێکی فراکسیۆنی یەکێتی-ش دەڵێت:" ئەم هەنگاوە دەبێتە هۆیەکی گرنگ بۆ پشتگیریکردنی بەرهەمهێنەرانی ناوخۆ و گەشەپێدانی کەرتی کشتوکاڵ و پەلەوەری و باشترکردنی دۆخی ئابووری هەرێم".

غەریب ئەحمەد ئەندامی فراکسیۆنی یەکێتی هاوکات ئەندامی لیژنەی کشتوکاڵ لەئەنجومەنی نوێنەرانی عیراق بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" دوای زنجیرەیەك گفتوگۆی چڕو کۆبوونەوەمان وەك لیژنەی كشتوكاڵی پەرلەمان لەگەڵ وەزارەتی کشتوکاڵی عیراق و وەزارەتی کشتوکاڵی حكومەتی هەرێم، هاوکات بە هەماهەنگی لەگەڵ بێگەرد تاڵەبانی وەزیری كشتوكاڵ توانرا سەرکەوتوبین لە رازیکردنی لایەنی پەیوەندیدار لە بەغدا بۆ هەڵگرتنی هەموو رێگرییەکانی بەردەم بەبازاڕکردنی بەرهەمە کشتوکاڵییەکان".

"هاوکات رێگەدان بە هەناردەکردنی بەرهەمی کێڵگە و پڕۆژە پەلەوەرییەکان و کردنەوەی دەرگا بۆ ناردنی گۆشتی مریشک و هێلکە و دووبارە دەستپێکردنەوەی هەناردە بۆ ناوەڕاست و خوارووی عیراق بەبێ بەرزبوونەوەی نرخەکەی، کە ئەم هەنگاوە دەبێتە هۆیەکی گرنگ بۆ پشتگیریکردنی بەرهەمهێنەرانی ناوخۆ و گەشەپێدانی کەرتی کشتوکاڵ و پەلەوەری و باشترکردنی دۆخی ئابووری هەرێم"،غەریب ئەحمەد وایوت.

PUKMEDIA