دارایی عیراق: ساڵی پار زیاتر لە 11 ترلیۆن دینارمان بۆ مووچەی هەرێم ناردووە

PUKMEDIA

دراوی 50 هەزار دیناری عیراقی

وەزارەتی دارایی عیراق رایدەگەیەنێت:" لە 11 مانگی ساڵی رابردوودا  13 ترلیۆن دینارمان بۆ هەرێم ناردووە، کە زیاتر لە 11 ترلیۆن دیناری بۆ مووچە بووە "، وەزارەتی دارایی هەرێم-یش ئاماژە بەوەدەکات:" وەزارەتی دارایی عیراق بۆ مووچە، تەنها 10  ترلیۆن دیناری بۆ ناردووین".

وەزارەتی دارایی عیراق ئاماری داهات و خەرجی11 مانگی ساڵی رابردووی بڵاوکردەوە، کەڕەوانەی هەرێمی كوردستانی كردووە و بەپێی ئامارەکە:" لە 11 مانگی ساڵی 2024 دا، خەرجی عیراق  136.4 ترلیۆن دینار بووە، بەجۆرێک خەرجیى رەوان 113.5 ترلیۆن دینار و مووچەی چاودێریى کۆمەڵایەتى 80 تریلیۆن دینار و خەرجى وەبەرهێنان22.8 تریلیۆن دینار بووە کە دەکاتە 16.7%ى تێکڕاى خەرجى، هاوکات داهاتی عیراق 135.3 تریلیۆن دینار بووە، بەجۆرێک داهاتى نەوتى 119 تریلیۆن دینار واتە 88% و داهاتى نانەوتى 16.2 تریلیۆن دینار واتە 12% بووە، بەمەش کورتهێنانى خەرجى 1.1 تریلیۆن دینار بووە و زیاتر لە ترلیۆنێک خەرجی لەداهات زیاتر بووە".

هەر لەئامارەکەدا وەزارەتی دارایی عیراق بڕی پارەی 11 مانگی ساڵی رابردووی بڵاوکردەوە کە بۆ هەرێمی کوردستانی خەرجکردووە و ئاماژەی بەوەداوە:" بەشێوەیەکی گشتی حکومەتی عیراق بڕی 13.1 ترلیۆن دیناری بۆ هەرێم خەرجکردووە، کە لەو ژمارەیە 11.5 تریلیۆن دیناری بۆ مووچە بووە و ئەوەشی دەمێنێتەوە، بۆ خەرجى خزمەتگوزارى 283.7 ملیار دینار و خەرجى کاڵا 443.6 ملیار دینار و خەرجى چاککردنەوە 152 ملیار دینار خەرجى سەرمایە 111.3 ملیار دینار بەکارهێنراوە.


هاوکات رۆژی 15-1-2025 لەڕاگەیەنراوێکدا وەزارەتی دارایی حکومەتی هەرێمی کوردستان بڵاویکردەوە:"بەپێی کشف حسابی بانکیمان لە بانکی ناوەندی عیراق لقی هەرێم / هەولێر، لە( 1-1-2024 تا 31-12-2024 ) وەزارەتی دارایی حکومەتی فیدراڵ لە کۆی(20,910,463,950,000)  تەنها(10,026,883,544,589)دیناری ناردووە، کە دەکاتە تەنها 48% ی کۆی شایستەکانی هەرێم بە پێی یاسای بوودجەی گشتی عیراق و لەو سالەشدا وەزارەتی دارایی فیدراڵ یەک دیناری بۆ خەرجی بەکارخستن و وەبەرهێنان بۆ هەرێمی کوردستان نەناردووە، ئەو تەمویلەشی بۆ مووچە ناردویەتی بەنزیکەیی دەکاتە مووچەی (10) مانگی مووچەخۆران و فەرمانبەرانی هەرێمی کوردستان لە تێکڕای ساڵەکە، ئەو پارەیەشی ناردویەتی بەپچڕ پچڕ و بە (52) گوژمە گەیشتۆتە سەر هەژماری بانکی وەزارەتمان".

PUKMEDIA