مانگرتووانی سلێمانی: كەس ناتوانێت بەناوی ئێمەوە بڕیار بدات

ئەرشیف

مامۆستایان و فەرمانبەرانی مانگرتوو

مانگرتووانی سلێمانی وەرگرتنی چارەسەریان رەتكردەوەو دەڵێن: "چارەنووسی ئێمە بەدەست خۆمان و جەماوەرەو كەس ناتوانێت بەناوی ئێمەوە بڕیار بدات"، هاوكات داوای دابەشكردنی مووچەی مانگی 12 دەكەن.

ئەمڕۆ 7-2-2025، مامۆستایان و فەرمانبەرانی مانگرتوو لەسلێمانی لەكۆنگرەیەكی رۆژنامەوانیدا هەڵوێستێكی نوێیان دەربڕی و رایانگەیاند: "لەكاتێكدا كەحكومەتی هەرێم پەیوەندیداری راستەوخۆیە بەم پرسەوە كەچی بێدەنگەو وتەبێژی حكومەتیش بەزمانێكی نالایەق پەیامی حكومەتی سەبارەت بەئێمە بەیان كردو دەركەوت گیانی 13 هاونیشتمانی بۆ حكومەت بێبەهایە".

راشیانگەیاند: "حكومەتی هەرێم لەدابەشكردنی مووچەی ئەم مانگەدا دەستی بۆ مینحەی خانەنشینان برد كە بەفەرمانی حكومەتی عیراق زیادكرابوو".

ئاماژەیان بەوەشكرد: "داواكارین حكومەتی هەرێم مووچەی مانگی 12 ی ساڵی رابردوو دابەشبكات و ئێمەش بەبێ دەستكەوتی بەرجەستە مانگرتن ناشكێنین".

لەكۆتایی پەیامەكەشیاندا مانگرتووان رایانگەیاند: "لەمانگرتن بەردەوامدەبین و لەمڕۆشەوە چارەسەری پزیشكی رەتدەكەینەوەو كەسیش ناتوانێت بەناوی ئێمەوە بڕیار بدات".


رۆژی 25-1-2025،  13 مامۆستاو فەرمانبەر كە سیانیان ژنن، لەبەردەم ئۆفیسی نەتەوە یەكگرتووەكان لەسلێمانی مانگرتنیان لەخواردن و خواردنەوە راگەیاندو بڕیاریاندا تا وەڵامی داواكارییەكانیان نەدرێتەوە مانگرتن نەشكێنن، داواكارییەكانیشیان خۆی لەمووچەو تەوتین و شایستە داراییەكانی مووچەخۆرانی هەرێم-دا دەبینێتەوە.


PUKMEDIA