ئه‌ندامێكی فراكسیۆنی یه‌كێتی ده‌یه‌وێت شوێنه‌واره‌كانی گه‌رمیان بخاته‌ لیستی شوێنه‌واره‌ جیهانییه‌كانەوە

ئاژانسەکان

قەڵای شێروانە

لەسەر داوای ئەندامێکی ئەنجومەنی نوێنەرانی عیراق لەفراکسیۆنی یەکێتی، وەزیری رۆشنبیری و راگەیاندن و گوشتوگوزار و شوێنەواری عیراق، بڕیاریدا بەدواداچوون بکرێت بۆ چوار شوێنەواری گەرمیان تا بخرێنە لیستی شوێنەوارە جیهانیەکانی رێکخراوی یونسکۆ.


کاروان یاروەیس ئەندامی ئەنجومەنی نوێنەرانی عیراق لەفراکسیۆنی یەکێتی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" لەسەر داواکاری بەندە وەزیری رۆشنبیری و راگەیاندن و گوشتوگوزارو شوێنەواری عیراق دەستەی شوێنەواری عراقی راسپارد بەدواداچوون بکەن بۆ چوار شوێنەواری گەرمیان تا بخرێنە لیستی شوێنەوارە جیهانیەکانی رێکخراوی یونسکۆ".

"دەستەی شوێنەواری عیراق توێژینەوەو بەدواداچوونی دەستپێدەکات بۆ ئەوەی بزانێت هەریەک لە قەڵای شێروانە و شوێنەواری حەوش کوروو و دیواربەندی بێلولە و گۆڕ دەخمە لە کفری مەرجەکانی رێکخراوی یۆنسکۆی تیایە، تاوەکو عیراق بەرەسمی داوا بکات بخرێنە لیستی شوێنەوارە جیهانیەکانەوە و ئەگەر ئەم هەوڵەش بگاتە ئەنجام گەرمیان ئەچێتە سەر نەخشەی جیهانی شوێنەوارەکان".


PUKMEDIA