سروە محەمەد: دادگای فیدراڵی جێبەجێکردنی سێ یاساکەی رەتنەکردوەتەوە

PUKMEDIA

سروە محەمەد ئەندامی ئەنجومەنی نوێنەرانی عیراق

دادگای باڵای فیدراڵی بەهۆی چەند سکاڵایەکەوە کە لەلایەن چەند پەرلەمانتارێکی شیعەوە تۆمارکرابوون، بڕیاریدا بەراگرتنی جێبەجێکردنی هەرسێ یاسای لێبوردنی گشتی، یاساى باری کەسی و یاساى گەڕانەوەی زەوی و زار بۆ خاوەنەکانیان لەناوچە جێناکۆکەکان، ئەندامێکی ئەنجومەنی نوێنەران-یش دەڵێت:" بڕیارەکەی دادگای فیدراڵی بۆ رەتکردنەوەی یاساکە نییە، بەڵکو تا یەکلابوونەوەی سکاڵاکان جێبەجێکردنی یاساکەی راگرتووە".

سروە محەمەد ئەندامی ئەنجومەنی نوێنەرانی عیراق لە فراکسیۆنی یەکێتی بەوێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" لەلایەن بەشێک لە پەرلەمانتارە شیعەکانەوە لەدادگای فیدراڵی سکاڵا لەسەر چەند بڕگەیەکی یاسای لێبوردنی گشتی تۆمارکرا، بەڵام ئەمە مانای ئەوە نییە یاساکە رەتکرابێتەوە، بەڵکو تا یەکلابوونەوەی سکاڵاکان جێبەجێکردنی یاساکە راگیراوە".

"ئەگەر دادگای فیدراڵی هەر بڕگەیەک لەسێ یاساکە رەتبکاتەوە، پێویستە لەپەرلەمان دەنگ لەسەر ئەو بڕگەیە بدرێتەوە و لایەنەکان رێککەوتنی لەسەر بکەنەوە، چونکە فراکسیۆنەکان ئامادە نین جارێکی دیکە دەنگ لەسەر ئەو یاسایە بدەنەوە"، سروە محەمەد وایوت.

ئەو ئەندامەی ئەنجومەنی نوێنەران لەفراکسیۆنی یەکێتی ئاماژەی بەوەشکرد:"بەپێی سکاڵاکان کێشەکە لەوەدایە کە هەر سێ یاساکە پێکەوە دەنگیان لەسەر دراوە، کە ئەوان دەیانویست یەک یەک دەنگی لەسەر بدرێت".

دادگای فیدراڵی جێبەجێکردنی یاساکەی راگرتووە

هاوکات د. بڕیار رەشید ئەندامی فراکسیۆنی یەکێتی لە ئەنجومەنی نوێنەرانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "بڕیارەکەی دادگای فیدراڵی لەبارەی هەرسێ یاساکەوە تەنها بڕیاری جێبەجێنەکردنە لە ئێستادا، نەک رەتکردنەوەی یاساکان".

ئەمەش لەکاتێکدایە، رۆژی ٤-٥-٢٠٢٥ لەراگەیەنراوێکدا دادگای فیدراڵی رایگەیاند:"بەهۆی پێنج سکاڵاوە کەلەلایەن چەند پەرلەمانتارێکەوە کراوە، جێبەجێکردنی هەرسێ یاسای لێبوردنی گشتی، یاساى باری کەسی و یاساى گەڕانەوەی زەوی و زار بۆ خاوەنەکانیان رادەگرین و راگرتنی جێبەجێکردنی یاساکان تاوەکو ئەو کاتە دەبێت کە ئەو سکاڵایانە یەکلایى دەکرێنەوە".

PUKMEDIA