كێشەی مووچەخۆرانی هەرێم چارەسەركرا

وەزارەتی دارایی هەرێم

كۆبوونەوەی هەردوو وەزارەتی دارایی هەرێم و عیراق

كێشەی دواكەوتنی مووچەی مووچەخۆرانی هەرێم بۆ ساڵی 2025 كۆتایی هات و وەزیری دارایی هەرێمیش رایدەگەیەنێت: "بەهیچ شێوەیەك مووچەی ئەمساڵ دواناكەوێت و بڕیاردراوە لەدوو رۆژی داهاتوودا مووچەی مانگی 1ی مووچەخۆرانی هەرێم لەبەغداوە بنێردرێت".


ئاوات شێخ جەناب وەزیری دارایی هەرێم لەكۆنگرەیەكی رۆژنامەوانیدا لەبەغدا رایگەیاند: "لەكۆبوونەوەكانی چەند رۆژی رابردووی هەردوو وەزارەتی دارایی هەرێم و عیراق لێكتێگەیشتنی زۆر باش لەنێوان هەردوولادا هەبووەو توانیومانە كۆتایی بەدواكەوتنی مووچە بۆ ساڵی 2025 بهێنین و بەهیچ شێوەیەك مووچەی ئەمساڵ دواناكەوێت".


راشیگەیاند: "وەزارەتی دارایی عیراق بڕیاریداوە لە دوو رۆژی داهاتوودا مووچەی مانگی 1ی مووچەخۆرانی هەرێم بنێرێت، هاوكات ئەو رێككەوتنانەی لەنێوان هەردوو وەزارەتی دارایی هەرێم و عیراقدا كراون بەو ئامانجەن چیدیكە هاتنی مووچە لەبەغداوە نەبێتە هەواڵ".

ئەمەش لەكاتێكدایە ماوەی 4 رۆژە وەفدی باڵای دارایی هەرێم لەبەغدایەو چەندین كۆبوونەوەی لەگەڵ وەزارەتی دارایی عیراق بەسەرۆكایەتی تەیف سامی وەزیری دارایی ئەنجامداوەو دواجار گەیشتوونەتە رێككەوتن.



PUKMEDIA