زانکۆی سلێمانی لەچەند پسپۆرییەکدا پلەی یەکەم لەسەر ئاستی عیراق بەدەستدەهێنێت

PUKMEDIA

دەروازەی زانکۆی سلێمانی

زانکۆی سلێمانی لەچەند پسپۆڕییەکدا لەسەر ئاستی عیراق پلەی زانستی بەدەستدەهێنێت و یاریدەدەری سەرۆکی زانکۆی سلێمانی بۆ کاروباری زانستی-ش دەڵێت:" لە ماوەی رابردووشدا زانکۆی سلێمانی لە چەند بوارێکدا لەسەر ئاستی عیراق پلەی یەکەمی بەدەستهێناوە".

پ.د.زانا مەحمود یاریدەدەری سەرۆکی زانکۆی سلێمانی بۆ کاروباری زانستی لەکۆنگرەیەکی رۆژنامەوانیدا رایگەیاند:" بەخۆشحاڵییەوە زانکۆی سلێمانی توانی لە چەند پسپۆڕییەکی تایبەتدا دەستکەوتی گەورە تۆماربکات لە پسپۆڕییەکانی ئەندازیاری و فیزیکی و پزیشکی-دا لەسەر ئاستی عیراق پلەی زانستی بەدەستبهێنێت".

راشیگەیاند:"لە هەمان ئەو پسۆڕییانەدا زانکۆی سلێمانی لەسەر ئاستی نێودەوڵەتی پلەی نێوان 600 بۆ 800ی جیهانی تۆمارکردووە و ئەمەش یەکەم جار نییە، لە ماوەی رابردووشدا زانکۆی سلێمانی لە چەند بوارێکدا لەسەر ئاستی عیراق پلەی یەکەمی بەدەستهێناوە".


یاریدەدەری سەرۆکی زانکۆی سلێمانی بۆ کاروباری زانستی ئاماژەی بەوەشکرد:" ریزبەندییەکان شایەتی ئەو راستیەن کە زانکۆکەمان لەسەر رێگا راستەکەیە و بە پلانێکی ستراتیجی وورد بەردەوامە لە پێشکەوتن، بۆ ئەمەش سوپاسی مامۆستایان و ستاف و خوێندکاران دەکەین".


PUKMEDIA