ئەنجومەنی نوێنەران بۆ داواکارییەکانی کورد و سونە و شیعە کۆدەبێتەوە

PUKMEDIA

بینای ئەنجومەنی نوێنەرانی عیراق

بڕیارە ئەمڕۆ 21ـی1ـی2025 ئەنجومەنی نوێنەرانی عیراق کۆببێتەوە و دەنگ لەسەر چوار پرۆژە یاسای گرنگ و چەند یاسایەکی دیکە بدات، ئەندامێکی ئەنجومەنی نوێنەرانی عیراقیش دەڵێت:" دوو پرۆژە یاسایان بۆ کورد گرنگن".


غەریب ئەحمەد ئەندامی ئەنجومەنی نوێنەرانی عیراق لە فراکسیۆنی یەکێتی بە وێبسایتی رەسمی یەکێتیی نیشتمانیی کوردستان PUKMEDIA راگەیاند:" لە دانیشتنی ئەمڕۆدا چوار پڕۆژە یاسای گرنگ خراوەتە ناو کارنامەی دانیشتنی پەرلەمان و دووان لە پڕۆژە یاساکان بۆ كورد گرنگن،  كە بریتین لە هەڵوەشاندنەوەی بڕیارەكانی سەردەمی بەعس تایبەت بە تەعریب لە كەركوك و دەوروبەری و هەموواری یاسای بودجەی گشتی عیراق كە یەکێک لە بڕگەکانی یاساکە تایبەتە بە پرسی نەوت لەنێوان هەرێم و بەغدا".


"دەرکردنی لێبوردنی گشتی بۆ زیاتر لە (٢٠) هەزار بەندكراو، ئەم پڕۆژە یاسایەش پێكهاتەی سوننە خاوەنداریێتی دەكات،باری كەسیی ئەم پڕۆژەیەش پێشنیاری شیعەیە كە ڕێگە دەدرێت بە مارەیی كچانی خوار ١٨ ساڵ و بەدیاریكراوی لە ٩ساڵیەوە بەیاسایی دەكرێت"، غەریب ئەحمەد وایوت.

هاوکات  لە دانیشتنی ئەمڕۆدا، ئەنجومەنی نوێنەران چەند پرۆژە یاسایەکی دیکە تاووتوێدەکات، کە بریتین لە (هاوتاکردنی بڕوانامە، تەندروستی دەروونی، خوێندن لە زانکۆ ئەهلییەکان،سەندیکای وەرزشەوانان).

PUKMEDIA