چەندین خزمەتگوزاری گرنگ لە سلێمانی جێبەجێدەکرێت

ئەرشیف

شاری سلێمانی

ئەمڕۆ چوارشەممە ١٥-١-٢٠٢٥ ئەنجومەنی شارەوانیی سلێمانی بەسەرپەرشتیی سەرۆكی ئەنجومەن و ئامادەبوونی جێگری سەرۆك و زۆرینەی ئەندامانی ئەنجومەن دووەم دانیشتنی ئاسایی خۆی لەساڵی نوێدا ئەنجامدا کە ماوەی ٨ سەعاتی خایاند و چەندین پرسی گرنگ سەبارەت بەشاری سلێمانی گفتوگۆی لەبارەوەکرا. 

لەکۆبوونەوەکەدا ئەندامانی ئەنجومەنی شارەوانی تیشكیان خستەسەر چەند بابەتێكی گرنگ بۆ هاووڵاتیان شاری سلێمانی بەتایبەت خزمەتگوزاری گواستنەوەی گشتیی، بڕیاردا لەمساڵدا كاری جدیی لەسەربکرێت، هاوکات گفتوگۆکرا لەسەر پێشخستنی سێكتەرەكانی ( كشتوكاڵیی، گەشتیاریی، پیشەسازیی) بەشێوەی وەبەرهێنان، كە دەبێتە گرنگترین سێكتەرەكان.

هەر لەدانیشتنەکەدا ئەندامانی ئەنجومەن تیشكیان خستەسەر جوانكردن و دیزاینكردنی شەقامی سالم بەدیزاینێکی سەردەمیانە، وێڕای بەشداریکردنی نوێنەری بەڕێوەبەرایەتی شوێنەوارو كەلەپوری سلێمانی و لێپرسراوی بەشی زیادەڕۆیی سلێمانی لەکۆبوونەوەکەدا بەمەبەستی گفتوگۆکردنی زیاتر سەبارەت بە پێشکەشكردنی خزمەتگوزاری زیاتر بەشارەکە، هاوکات چەند بڕیارێك ئیمزای لەسەركرا كە داواكاریی هاووڵاتیان بوون.

PUKMEDIA