پەرلەمانتارێک: گه‌مارۆدانه‌وه‌ی سه‌ر فڕۆكه‌خانه‌ی سلێمانی سیاسییه‌

PUKMEDIA

فرۆکەخانەی سلێمانی

توركیا سزای سه‌ر فڕ‌ۆكه‌خانه‌ی سلێمانی بۆ شه‌ش مانگی دیكه‌ درێژكرده‌وه‌و ئه‌ندامێكی لیژنه‌ی گواستنه‌وه‌و په‌یوه‌ندییه‌كانیش له‌ئه‌نجومه‌نی نوێنه‌رانی عیراق ده‌ڵێت :"بڕ‌یاره‌كه‌ سیاسییه‌و فڕ‌ۆكه‌خانه‌كه‌ كێشه‌ی یاسایی و ته‌كنیكی و ئه‌منی نییه‌".

كاروان یاروه‌یس ئه‌ندامی لیژنه‌ی گواستنه‌وه‌ و په‌یوه‌ندییه‌كان له‌ئه‌نجومه‌نی نوێنه‌رانی عیراق به‌ وێیسایتی ره‌سمی یه‌كێتیی نیشتمانیی كوردستان PUKMEDIA ی رایگه‌یاند:"پێشتر سێ لیژنه‌ له‌به‌غداوه‌ سه‌ردانی فڕ‌ۆكه‌خانه‌ی سلێمانیان كردووه‌و به‌پێی لێكۆڵینه‌وه‌ی لیژینه‌كان، فڕۆكه‌خانه‌كه‌ هیچ كێشه‌ی  یاسایی و ته‌كنیكی و ئه‌منی نییه‌، بۆیه‌ بڕ‌یاره‌كه‌ سیاسییه‌".

 "دوێنێ 6-1-2025 ده‌سه‌ڵاتی فڕۆكه‌وانی مه‌ده‌نی توركی (نۆتام) بروسكه‌یه‌كی بۆ ده‌سه‌ڵاتی فڕۆكه‌وانی مه‌ده‌نی عیراق ناردوه‌و سزاكانی سه‌ر فڕۆكه‌خانه‌ی نێوده‌وڵه‌تی سلێمانی هه‌تا مانگی حه‌وتی ئه‌مساڵ درێژ كردوه‌ته‌وه‌ به‌بێ دیاریكردنی هۆكاره‌كانی درێژكردنه‌وه‌كه‌"، كاروان یاروه‌یس وایوت.

بڕیارەکە زیان بەهاووڵاتیان دەگەیەنێت

فارس جەواری توێژەر و راوێژکار و فڕۆکەوانی بە وێبسایتی رەسمیی یەکێتیی نیشتمانیی کوردستان PUKMEDIA ی راگەیاند:" فڕۆکەخانەی نێودەوڵەتی سلێمانی مۆڵەتی رەسمیی دەسەڵاتی فڕۆکەوانی شارستانی عیراقی هەیە و هیچ کێشەیەکی تەکنیکی و ئەمنیی نییە و پابەندی سەرجەم رێنماییەکانە، بەوپێیەش گەمارۆخستنەسەری سیاسییە".

" بەم گەمارۆخستەنەسەرە جگە لەفڕۆکەخانەی سلێمانی هاووڵاتیانیش زەرەرمەند دەبن، چونکە بەبێ هۆکار بێبەشکراون لە گەشتکردن لە سلێمانییەوە بۆ تورکیا یاخود فڕین بەسەر ئاسمانەکەیدا"، فارس جەواری وایوت.  

توركیا  بۆ یه‌كه‌مجار  له‌  6ـی4ـی 2023  گه‌مارۆی گه‌شتیه‌ ئاسمانییه‌كانی خسته‌ سه‌ر فڕ‌ۆكه‌خانه‌ی نێوده‌وڵه‌تی سلێمانی و له‌ رۆژی 13ـی 1ـی2024 جارێكی دیكه‌ گه‌مارۆكانی درێژكرده‌وه‌، هاوكات رۆژی 22ـی6ـی2024 بۆ ماوه‌ی شه‌ش مانگی دیكه‌ گه‌مارۆكانی نوێكرده‌وه‌، ئه‌مه‌ش له‌كاتێكدایه‌ دوێنێ 6ـی1ـی2025 بۆ ماوه‌ی شه‌ش مانگی دیكه‌ گه‌مارۆكانی نوێكرده‌وه‌ه‌و به‌مه‌ش نزیكه‌ی دوو ساڵه‌ فڕۆكه‌خانه‌ی نێوده‌وڵه‌تی سلێمانی له‌ لایه‌ن توركیاوه‌ گه‌مارۆی خراوه‌ته‌سه‌رو كاتی كۆتایی هاتنی گه‌مارۆكه‌ش به‌نادیاریی ماوه‌ته‌وه‌.

PUKMEDIA