بۆ دابەشکردنی مووچە حکومەت سێ بژاردەی هەیە

PUKMEDIA

دراوی عیراقی

حکومەتی هەرێمی کوردستان بۆ دابەشکردنی مووچەی مانگی ١١ ی مووچەخۆرانی هەرێم، چاوەڕوانی ناردنی پارە لەبەغدا دەکات و سەرچاوەیەکیش لە حکومەتی هەرێم رایدەگەیەنێت:"بۆ دابەشکردنی مووچە حکومەت سێ بژاردەی لەبەردەمدایە".

سەرچاوەیەک لەحکومەتی هەرێمی کوردستان کە لەسەر داوای خۆی ناوی بڵاوناکەینەوە، بە وێبسایتی رەسمیی یەکێتیی نیشتمانیی کوردستان  PUKMEDIA ی راگەیاند:" بۆ دابەشکردنی مووچەی مانگی ١١، حکومەتی هەرێمی کوردستان سێ بژاردەی لەبەردەمدایە، کە دووان لەبژاردەکان ناردنی پارەیە لەبەغداوە و بژاردەی سێیەمیش پڕکردنەوەی کورتهێنانی مووچەیە لەداهاتی ناوخۆ".

" حکومەتی هەرێم چاوەڕوانە سبەینێ یەکشەممە ٢٩-١٢-٢٠٢٤، دارایی عیراق بڕیار لەناردنی تەواوکاری مووچەی مانگی ١١ی مووچەخۆرانی هەرێم بدات کە بڕەکەی نزیکەی ٢٢٠ ملیار دینارە، یاخود مووچەی مانگی ١٢ بۆ هەرێم بنێرێت، بەمەش حکومەتی هەرێم دەتوانێت کورتهێنانی مووچەی مانگی ١١ پڕبکاتەوە و مووچە دابەشبکات".

ئەو سەرچاوەیە راشیگەیاند:"بژاردەیەکی دیکە کەلەبەردەم حکومەتی هەرێمدایە ئەوەیە کە لەداهاتی ناوخۆی سلێمانی و هەولێر و دهۆک کورتهێنانی مووچە پڕبکاتەوە و دەست بەدابەشکردنی بکات".

عیراق ٦٣١ ملیار دیناری بۆ هەرێم ناردووە

بەپێی زانیارییەکانی PUKMEDIA لەماوەی ١٠ رۆژی رابردوودا، دارایی عیراق بڕی ٦٣١ ملیار دیناری وەک مووچەی مانگی ١١ بۆ دارایی هەرێم ناردووە، بەڵام حکومەتی هەرێم چاوەڕوانی ناردنی ئەو بڕە پارەیە دەکات کە لەخشتەی بودجە موناقەلەی پێکراوە، کە بڕەکەی ٤٣٠ ملیار دینار بووە و نیوەی پارەکە وەک تەواوکاری مووچەی مانگی ١٠ بۆ هەرێم نێردراوە و چاوەڕوانی ناردنی نیوەکەی تری دەکرێت.

سەرچاوەکەی حکومەتی هەرێم ئەوەشی ئاشکراکرد:" لەگەڵ ئەوەی دارایی هەرێم بۆ دابەشکردنی مووچەی مانگی ١١ چاوەڕوانی بڕیاری سبەینێی دارایی عیراقە، بەڵام هەوڵەکان بۆ ئەوەیە کە پێش سەری ساڵ مووچەی مانگی ١١ دابەشبکات".

پشووەکان نابنە رێگر بۆدابەشکردنی مووچە

بەهۆی هاتنی سەری ساڵی نوێی زاینییەوە لەئێستادا مووچەخۆرانی هەرێم لەپشوودان، بەڵام بەپێی زانیارییەکانی PUKMEDIA کە لەوەزارەتی دارایی هەرێمەوە دەستیکەوتووە، پشووەکان نابنە رێگر لەبەردەم دابەشکردنی مووچەدا، ئەگەر دارایی عیراق هەر بڕە پارەیەک وەک مووچە بۆ هەرێم بنێرێت، دەتوانێت لەماوەی دوو رۆژدا مووچەی مانگی ١١ی مووچەخۆران دابەشبکات.

بەپێی راگەیەنراوی وەزارەتی دارایی هەرێم، حکومەتی هەرێم بۆ دابەشکردنی موچەی یەک مانگی مووچەخۆرانی هەرێم پێویستی بە بڕی ٩٩٦ ملیار دینارە، بەڵام تا ئێستا دارایی عیراق تەنها ٦٣١ ملیار دیناری وەک مووچەی مانگی ١١ بۆ هەرێم ناردووە و بەوپێیەش بڕی ٣٦٥ ملیار دینار کورتهێنان هەیە.