وەفدی یەکێتی بۆ کۆبوونەوە لەگەڵ پارتی گەیشتە پیرمام

PUKMEDIA

کۆبوونەوەی وەفدی یەکێتی و پارتی لەپیرمام

بڕیارە ئەمڕۆ 17-12-2024 یەكێتی و پارتی بۆ پێكهێنانی حكومەت و بەگەڕخستنەوەی پەرلەمان لەپیرمام كۆببنەوە.

سەعدی ئەحمەد پیرە وتەبێژی یەكێتیی نیشتمانیی كوردستان بەوێبسایتی رەسمی یەكێتی PUKMEDIA ی راگەیاند: "ئەمڕۆ 17-12-2024، وەفدی یەكێتیی نیشتمانیی كوردستان و پارتی دیموكراتی كوردستان كەبۆ پێكهێنانی حكومەت دیاریكراون لەپیرمام كۆدەبنەوە".

"ئامانجی كۆبوونەوەكە گفتوگۆ كردنە لەسەر چۆنێتی پێكهێنانی حكومەتی نوێی هەرێمی كوردستان و بەگەڕخستنی پەرلەمانی كوردستان، هاوكات بەهۆی هەستیاری بارودۆخی ناوچەكەو گۆڕانكارییەكانی سوریا بەباشی دەزانین گفتوگۆ لەسەر ئەو پرسەش بكرێت" سەعدی ئەحمەد پیرە وادەڵێت.

وتەبێژی یەكێتیی نیشتمانیی كوردستان راشیگەیاند: "پرسی مووچەی مووچەخۆرانی هەرێم تەوەرێكی دیكەی كۆبوونەوەكە دەبێت، لەكاتێكدا مووچەخۆران چەند مانگێكە مووچەكانیان وەرنەگرتووەو ئەمەش لێكەوتەی خراپی لەسەر ژیانی خەڵك و دەوامی خوێندنگەو فەرمانگەكان هەیە".

ئەمەش لەكاتێكدایە، رۆژی 30-11-2024، وەفدی یەكێتیی نیشتمانیی كوردستان و پارتی دیموكراتی كوردستان، لەبارەگای مەكتەبی سیاسی یەكێتی لەسلێمانی بۆ هەمان پرس یەكەم كۆبوونەوەیان ئەنجامدا، كە وەفدەكەی یەكێتی بەسەرۆكایەتی قوباد تاڵەبانی ئەندامی مەكتەبی سیاسی و بەئەندامێتی دەرباز كۆسرەت رەسوڵ، رێواز فایەق، نزار ئامێدی، رزگار حاجی حەمە، ئەندامانی مەكتەبی سیاسی بوو، هاوكات وەفدی پارتی دیموكراتی كوردستان بەسەرۆكایەتی هۆشیار زێباری و بەئەندامێتی پشتیوان سادق، دڵشاد شەهاب ئومێد سەباح بوو.

یەکێتی و پارتی: لێکتێگەیشتن بۆ یەکەم کۆبوونەوەی پەرلەمان هەبێت

PUKMEDIA